Хэрэглэгчийн төлөө ажилладаг, өрсөлдөөнийг зохицуулж байх ёстой чухал байгууллагын хувьд ажил нь урагшлахгүй байгаа нь надад ч гэсэн ажиглагддаг байлаа. Байгаа байхгүй нь мэдэгдэхгүй байсан. Тэгэхээр энэ бүх хэмнэл өөрчлөгдөнө

Шударга өрсөлдөөн хэрэглэгчийн төлөө газрын дарга О.Магнайтай ярилцлаа.

-Шинэ ажилтайгаа танилцсан уу. Юунаас ажлаа эхлүүлэх гэж байна вэ?

-Өнгөрсөн бямба гаригт Засгийн газрын ээлжит хуралдаан хуралдсан. Өчигдөр ажлаа албан ёсоор хүлээж авлаа. Ажилтайгаа танилцаж эхэлж байгаа ч нийгэмд амьдарч байсан иргэнийхээ хувьд энэ байгууллагын ажлыг юунаас эхлүүлэх вэ гэдэг тодорхой байгаа. Хамгийн нэгдүгээрт, өмнөх даргыг Засгийн газрын хуралдаанаар өөрчлөх болсон үндэслэлийг та бүхэн мэдэж байгаа байх. Энэ оны эхээр нефть импортлогч компаниудыг шалтгаангүйгээр хуйвалдаж үнээ өсгөсөн гэх үндэслэлээр 17 тэрбум төгрөгийн торгууль тавьсан юм. Энэ торгуулийг өмнөх удирдлага нь хүчингүй болгосон нь түүнийг огцруулах үндэслэл болсон. Энэ асуудлыг би өөрөө хянаж, албан ёсоор шалгаж эхэлсэн. Эхний арга хэмжээнүүдийг авах болно. Мөн үүрэн телефоны компаниудтай холбоотой гомдол маш их байдаг. Ярианы төлбөр өндөр гардаг, урамшуулал сугалаа зарлаад тэр нь шударга бус байна гэсэн гомдлууд гарч байна. Мөн агаарын тээврийн тасалбарын үнэ зорчигчдыг бухимдуулдаг зүйлийн нэг яах аргагүй мөн. Эдгээр асуудлыг анхаарч ажиллана. Иргэдтэйгээ ойрхон байхын тулд өчигдрөөс эхлэн манай байгууллагаас иргэд, олон нийтийн хэрэглээ болох Facebook, Twitter-ийг нээж ажиллуулж байгаа. Эдгээр хэрэгслээр дамжуулж иргэдээс ирсэн санал, гомдлыг албан ёсных гэж хүлээж авч шалгах болно.

-Алт мөнгөний дэлгүүр, худалдаа эрхлэгчидтэй холбоотой гомдол их байдаг. Үнээ нэмж бичээд 20-30 хувь хямдрууллаа гэж хэрэглэгчдийг хуурдаг. Үүнд хариуцлага тооцоосой гэсэн хүлээлт байгаа байх?

-Манайх ерөнхийдөө Хэрэглэгчийн тухай, Өрсөлдөөний тухай хуульд хяналт тавих үүрэгтэй агентлаг. Ажил дөнгөж эхэлж байна. Иргэдээс ямар гомдол санал ирж байна. Тэр болгоныг шалгана. Энэ асуудал ч гэсэн миний чихэнд сонсогдож байсан зүйл.

-Монгол Улс Азийн орнуудаас өндөр инфляцитай орны тоонд орж байгаа. Үнийн хөөрөгдөлд яаж хяналт тавих вэ?

-Манай байгууллагаас өнгөрсөн хугацаанд хийсэн судалгаа бий. Зах зээлийн давамгайлдаг, монопол компанийн нэрсийг гаргасан байгаа. 30-40 байгууллагын нэрс байна. Цөөхөн хэдэн байгууллага хуйвалдаж, үнээ өсгөж, хэрэглэгчдийг хохироож байгаа зүйлд зайлшгүй арга хэмжээ авах ёстой юм. Ирэх долоо хоногоос хэвлэл, мэдээллийнхэнтэй уулзалт хийнэ. Ажлаа юунаас эхлэх тухай ярихаас гадна, гурваас дөрвөн тодорхой асуудалд дүгнэлт гарсан байгаа. Энэ дүгнэлтийг танилцуулна.

-Шударга өрсөлдөөн хэрэглэгчийн төлөө газар ажлаа хийдэггүй, сураггүй байгууллага гэж иргэд шүүмжилдэг. Энэ хандлага өөрчлөгдөх болов уу?

-Санал нэг байна. Хэрэглэгчийн төлөө ажилладаг, өрсөлдөөнийг зохицуулж байх ёстой чухал байгууллагын хувьд ажил нь урагшлахгүй байгаа нь надад ч гэсэн ажиглагддаг байлаа. Байгаа байхгүй нь мэдэгдэхгүй байсан. Тэгэхээр энэ бүх хэмнэл өөрчлөгдөнө. Хүчтэй байх ёстой. Зоригтой шийдвэр гарч байх ёстой. Манайх хууль бус ажиллагаанд торгууль тавих, эрх цуцлах, тухайн компанийг хуваах хүртэлх арга хэмжээг авах эрхтэй байгууллага юм. 2010 оны хуулийн өөрчлөлтийг мэдэж байгаа байх. Өмнө нь хөдөлмөрийн хөлсний доод хэмжээг 5-10 дахин үржүүлэх хэмжээтэй тэнцэх мөнгөөр торгодог байсан. Зах зээлд давамгай байдал үүсгэсэн компанийн хувьд энэ нь маш бага мөнгө юм. Харин хуульд өөрчлөлт орж, орлогын хувиар торгодог болсон нь шударга бус үйлдэлд таарсан хэмжээний торгууль ногдуулах боломжтой болсон. Үүний нэг жишээ нь, нефть импортлогчдод 17 тэрбум төгрөгөөр торгууль тавьсан явдал юм. Иргэд ч гэсэн нээрээ ч зөв дөө. Ийм хэмжээний торгууль тавих ёстой гэсэн хүлээлттэй байсан. Цаашдаа энэ жишгээр хуулийн хүрээнд л ажиллана.

-Монгол Улсад шударга өрсөлдөөн байдаг уу?

-Манайд шударга өрсөлдөөний зарчмаар үнийг тогтоохоос илүү хэдхэн нийлүүлэгч компани, аж ахуйн нэгж хуйвалдаж үнээ нэмдэг гэдгийг олон түмэн мэдэж байгаа. Нийлүүлэгч цөөхөн байгаа учраас өрсөлдөөний зарчмаар биш, хоорондоо хуйвалдаж үнэ тогтоож байна. Энэ үйлдлийг таслан зогсоох тал дээр хийх ажил их байгаа. Өргөн хэрэглээний бараа бүтээгдэхүүний судалгаа хийгдэж байна. Хуйвалдагч нартай тэмцэнэ, торгууль шийдвэр тавина. Үр дүн гарах болно.

-Шударга өрсөлдөөн хэрэглэгчийн төлөө газар ямар бүтэц, зохион байгуулалттай вэ. Өөрчлөлт орох уу?

-Одоогоор 40 орчим хүний орон тоотой бүтцээр ажиллаж байна. Бүтцийг зайлшгүй өөрчлөх ёстой. Агентлагийнхаа хуулиар салбарын сайд нь бүтцийг батлах ёстой юм. Ойрын өдрүүдэд бүтцээ өөрчилж ажиллах талаар би Шадар сайдтай ярилцана. Удахгүй шинэ бүтцээр ажиллах байх.

-Энэ албанд яагаад томилогдох болов?

-Надад Ерөнхий сайд санал болгож, томилсон. Ерөнхий сайд намайг чадна, энэ ажилд тохирно гэж бодсон байх гэж би ойлгож байна.

-Сонгуульд яагаад нэр дэвшээгүй вэ?

-Энэ асуултыг уулзсан хүн бүхэн тавьж байна. Яагаад өнгөрсөн сонгуулиар нэр дэвшээгүй вэ гэж асуудаг. 2008 оны сонгуулиар болсон үйл явдлыг та бүхэн санаж байгаа байх. Миний буруу үйлдэл байгаагүй ч гэсэн таван хүний амь нас эрсдсэн үйл явдал болсон. Тиймээс энэ асуудалд би өөртөө ёс зүйн хариуцлага тооцож нэр дэвшээгүй юм.

-Ардчилсан намынхаа үйл ажиллагаанд оролцож байгаа юу?

-Тэгэлгүй яахав. Гэхдээ яг өнөөдөр үйлчилж байгаа хуулиар бол төрийн албан хаагч учраас намаасаа түр түдгэлзэж байгаа.

-Ж.Батзандан найзтайгаа холбоотой байгаа биз дээ?

-Ж.Батзандан бид хоёр байнга уулздаг. Найзаас ч илүү гэр бүлийн найзууд. Өдөр болгон л уулзана ш дээ. Яагаад гэвэл, үзэл санаа гэдэг зүйлийг үргэлж цэнэглэж бэхжүүлж байх ёстой байдаг. Өдөр болгон уулзаж, үзэл санаагаа бэхжүүлэх нь сайхан байдаг.

-Сахилгагүй, зодоон хийгээд байдаг хүүхдийг боксоор хичээллүүлж, зөв замд нь орууллаа гэж ярьдаг шүү дээ. Таныг бас тохирсон ажил дээрээ очлоо гэж хүмүүс дүгнэж ярьж байна...

-Яг үнэн. Миний шинэ ажлын талаар өчигдөр хэд хэдэн телевизийн мэдээллийн хөтөлбөрөөр хөндсөн байна лээ. Мэдээж нийгэм энэ байгууллагаас хүлээж байдаг зүйл их байгаа байх. Тэр тусмаа Магнайгаас. Тэгэхээр энэ ажилдаа сэтгэл гаргаж хэн гэдгээ зайлшгүй харуулах ёстой. Өмнө нь би олон хүмүүсийг шүүмжилж байсныг мэдэх байх. Тиймээс өөртөө хатуу шаардлага тавьж ажиллах болно. Шударга, сэтгэлтэй ажиллах ёстой. Эх оронч байх нь миний өөртөө нэг номерт тавьдаг зүйл юм. Нийгэм, иргэдийн тавьж байгаа шаардлага, хүлээлтийг маш өндрөөр ухамсарлаж ажиллах болно.

О.Магнай: Ерөнхий сайд намайг энэ ажилд тохирно гэж бодсон байх