Хүн ажиллаж хөдөлмөрлөж байж хоолоо олж иддэг. Тэр хүн Ерөнхийлөгчийн ах байснаараа төрийн албанд ажиллаж болохгүй гэсэн заавар журам байхгүй.

Гэвч улс төр хатуу тоглоом хойно дүүгийнх нь хэлсэн үгэн дээр дөрөөлж, ахыг нь ажлаа хүлээлгэн өгөхөөс өөр аргагүй шахаанд оруулсан ч байж болох талтай.

Дүүгээ дарга болох тоолонд албан тушаал ахиж, хурган даргын суудлаар тасарч үзээгүй гэх хэл амны бай болсоор ирсэн Ц.Арсландорж гэгч хэн бэ? Сүүний үйлдвэрийн лаборантаар ажлын гараагаа эхлүүлсэн тэрээр Найрамдлын район (Баянзүрх дүүрэг)-д хороон дарга, хот тохижилтын байцаагч, байцаагч инженер, ахлах байцаагч, гаражийн дарга, Тохижилт үйлчилгээний компаний захирлын алба хашиж явсан. Дараа нь УБТЗ-ын Авто тээвэр үйлчилгээний төвд орлогч дарга, дарга, УБТЗ-ын Бээжин дэх төлөөлөгчөөр ажиллажээ.

Нийслэлийн Засаг дарга Э.Бат-Үүл нийслэлийн засаг даргын хэрэгжүүлэгч агентлаг болон Захирагчийн ажлын албаны харъяа газрын дарга нарыг томилохдоо Ц.Арсландоржийг “Улаанбаатар зам, засвар арчлалт” НӨҮГ-ын даргаар тавьчихсан. Энэ нь “дайран дээр давс нэмнэ” гэгчээр ардчилагчид ам бүлээрээ төрийн албанд шингэлээ хэмээх сөрөг хүчнийхний бачимдлыг нэгээр нэмж, улам гааруулжээ.

Эх сурвалжийн мэдээлснээр Ц.Арсландорж саяхан ажлаа хүлээлгэн өгсөн байна. Чухам юуны учир ажлаа өгөв гэдгийг хүмүүс өөр өөрийнхөөрөө тайлбарлах.

Засгийн эрхийг олон жил гартаа атгаж дураараа авирлахдаа МАН-ынхан төрийн албыг ах дүү, хамаатан садны цугларалт болгож байсан гашуун түүх бий. Гэвч түүнээс ангижрах нэг ч алхам хийж, гарц хайгаагүйг хэлэх хүн олон. Харин ардчилагчдад ичих нүүр, эмээх сэтгэл, төр түмнээ хүндэтгэх үзэл бий бололтой. Хэл ам хэрүүл шуугианы бай болсноос ажлаа хүлээлгээд өгчихсөн нь ч дээр биз.

Нөгөөтэйгүүр Ерөнхийлөгч “Төрийн албанд нүүр­лэсэн төрөл, төрөгсдийн хэлхээг таслана” гэж хэлсэн үгэндээ эзэн болж, үлгэр дууриал үзүүллээ гэж үзэх хүмүүс ч байна.