Германы бундестагийн гишүүд стресст орсон байдаг гэнэ. Тэдний өдрийн цагийн хуваарь минутаар төлөвлөгдсөн байдаг бөгөөд түүндээ бэлтгэх ямар ч цаг гардаггүй аж. Тиймээс ихэнх нь фракцын удирдлага, лоббичид ямар санал хэлнэ, түүгээр л саналаа өгдөг байна. Тэгвэл Германы депутатуудын өдрийн төлөвлөгөө ямаршуухан байдгийг сонирхоцгооё.

Бундестагийн гишүүд ямар ч чөлөө завгүй ажилладгийг хэн нэгийнх нь өдрийн цагийн хуваарийг хараад л ойлгоно. Тэд өдөр бүр шинжээчдийн хоёр комисст орж ажиллах ёстой. Завсраар нь санал өгнө. Тэдний ширээн дээр дараачийн хурал гэхэд уншиж дуусгах ёстой 100 гаруй хуудас реферат хэвтэнэ. Ингээд компьютерийн дэлгэцээ харахад сонгогчдын өч төчнөөн хүсэл, санал, шаардлага ирсэн байдаг аж.

Хоногт 12-16 цаг ажилладаг Марко Бюлов улстөрийн үг хэллэгээс аль болох зайлсхийдэг нэгэн юм. Тэрбээр Германы Социал-демократ намаас бундестагт сонгогдон, 10 жил гишүүнээр ажиллаж байгаа аж. Бюлов «Хэрвээ хэн нэгэн депутат ажлаа амжуулж байна, болгож байна гэж хэлж байвал түүн шиг худлаа юм байхгүй» хэмээн шулуухан мэдэгдсэн удаатай. Тэрбээр хоногт 12-16 цаг ажилладаг аж. Бундестагийн албан ёсны статистикаас авч үзвэл сүүлийн легислатурын хугацаанд (Нэг ээлжит чуулган. Эрх барих хугацаанд 16 чуулгантай) депутатууд дунджаар 1000 хуулийн төсөл, санаачилгыг харсан байдаг гэнэ. Эдгээр хуулийн төсөл, санаачилга нь олон хуудастай гэж болохооп ямар их юм уншдаг нь ойлгомжтой.

Жишээ нь, бундестагийн нэг хурал дээрх бичиг баримтыг цувуулан тавибал 10 метр урт ширээ шаардлагатай. Марко Бюлов "Хэрэв би энэ бүхнийг уншвал өөр ажил хийх цаг гарахгүй» хэмээн мэдэгджээ. Түүний хэлснээр зарим гишүун нь үүнээс болж стресст орсон гэнэ. Христийн Ардчилсан намын гишүүн, депутат Петер Гётц ч үүнийг баталж йяйня. Тэобээр бундестагийн гишүүдийг марафон гүйгчидтэй зүйрлэжээ. Үүн дээр интернэт дэх ажлыг нь нэмж болно. Сонгогчид тойргоос нь нэр дэвшсэн гишүүддээ цахим шуудангаар санал хүсэлтээ илгээдэг байна.

Энэ талаар Петер Гётц «Тэд асуудлыг нь ойрын хэдэн цаг, ойрын өдрүүдэд шийдвэрлэж өгөхийг хүсдэг. Хариу өгөлгүй орхивол гомдож, дараагийн сонгуульд унагана шүү дээ» хэмээн шүүрс алдан өгүүлжээ.

Гишүүд нэмэлт орлого олох боломжтой

Бундестагийн гишүүдийн сарын цалин нь ойролцоогоор 8000 евро. Гэхдээ хуулиар бол тэднийг давхар ажил эрхлэхийг хорьдоггүй аж. Тэд 2007 оноос эхлэн хэдийг олдог, хаанаас мөнгө олсноо тайлагнадаг болжээ. "Bild" сонины сурвалжлагчдын тооцоолсноор зургаан гишүүн бүрийн нэг нь сард дунджаар 7000 евро нэмж олдог байна. Мэдээж давхар ажил нь юу ч байж болно. Жишээлбэл, Марко Бюлов гишүүн хоёр жилийн  өмнө «Бид зөвшөөрөгчид» нэртэй ном бичсэн билээ. Уг номондоо тэрбээр хоногийн 16 цагийг ажилдаа зарцуулдаг депутат байхын хэцүү талуудыг дурджээ.