Эхнэр нь британи түншээ хөнөөсөн хэргээр цаазын ял сонсохдоо хүрч, өөрөө авилгын хэргээр улс төрийн тавцангаас зайлуулагдан Хятад орныг доргиож байсан нэртэй, зүстэй улстөрч Бо Силайн хэрэг явдлын дараа үүнээс дутахааргүй бас нэгэн шуугиан дэгдлээ.

Дундад улсын шинэ үеийн удирдагчдыг тодруулах Коммунист намын XVIII их хурлаас хоёрхон долоо хоногийн өмнө “The new york times ” сонин БНХАУ-ын Ерөнхий сайд Вэн Зябаогийн гэр бүлийн хөрөнгө чинээ 2.7 тэрбум долларт хүрсэн тухай мэдээлжээ.

2013 оны гуравдугаар сард болох Ардын их чуулганаар халаагаа өгөх гэж байгаа Вэн дарга энэ мэдээг сонсоод ихэд тавгүйтсэн бололтой. Бээжингийн эрх баригчид дээрх мэдээлэл Хятадын цахим хуудсуудаар тархахаас айж, байдаг бүх хяналт, хоригоо ашиглаж эхлээд байна.

Wen Jiabao 温家宝 нь 1942 оны 9 сарын 19-нд төрсөн одоо 70 настай. Yunsong, Ruchun гэх хүүхдүүдтэй. Хятадын 6 дахь ерөнхий сайд бөгөөд өөрөө бол геологи, инженерийн мэргэжилтэй хүн ажээ.

Өнгөрсөн зургадугаар сард bloomberg телевиз Хятадын Ерөнхийлөгч, Коммунист намын ерөнхий нарийн бичгийн дарга Ху Жинтаогийн халааг авах гэж буй Си Жинпиний хөрөнгө мөнгөний талаар мэдээлсний дараа мөн ийм сандралт болж байсан билээ. “The new york times” сонин “мөрдлөг”-өө нарийвчлан задлахдаа “Вэн Зябаог өндөр эрх мэдэлд байх үед түүний хүү, охин, дүү, хүргэн ах нь хэтэрхий баян болсон ньхарагдлаа гэжээ. Мөн Вэн даргын хамаатнууд найз нөхөд, ажлынхан болон бизнесийн түншээрээ дамжуулан ихээхэн хөрөнгө оруулалт, төсөв, тендерийн цаана нуугдаж буй олон тохиолдол байгаа аж.

Хятадын өнөөгийн эдийн засгийн өсөлт, хөгжлийн бодлогыг зангиддаг Вэн Зябаогийн гэр бүлд банкин дахь хадгаламж, үнэт эдлэлийн дэлгүүрүүд, аялал жуулчлалын цогцолбор, харилцаа холбооны компани, дэд бүтцийн төслүүд, бүр татварын диваажин болсон улс орнуудад хүртэл эд хөрөнгө байгаа хэмээн Америкийн сонинд бичжээ. Төрийн зөвлөлийн даргын эзэмшилд Бээжинд тансаг эдлэн, зуслан барих төсөл, Хятадын хойд нутаг дахь автомашины дугуйн үйлдвэр, 2008 оны олимпийн “Шувууны үүр” цэнгэлдэх болон бусад барилга байгууламжийг босгож байсан барилгын компани, дэлхийд томоохонд тооцогдох Рша Ап даатгалын компанийн хувьцаа багтаж байна.

2004 онд Вэн Зябаогаар удирдуулсан Төрийн зөвлөл Ping An компанийг бирж дээр хувьцаа гаргахыг зөвшөөрснөөр тус компани нэг тэрбум 391 сая евро цуглуулж чадсан юм. Энэ ажиллагааны үр дүнд Вэн Зябаогийн 90 настай ээж гэхэд л 93 сая еврогоор халаасаа дүүргэж байсан гэдэг. Гэвч эдгээр хувьцаа Ерөнхий сайдын төрөлх Тяньжин хотын Тайхун холдингийн нэр дээр бүртгэлтэй байдаг. Тайхун холдингийг Вэн даргын гэр бүлийн найз, бизнесмэн Дуан Вэйхун удирддаг тул тэрээр ийнхүү хөрөнгө, орлогоо нуун дарагдуулсан хэмээн хардаж байна. Хятадад улс төрийн эрх мэдэл эдийн засгийн эрх мэдэлтэй нягт холбогдсон байдаг. Дээр нь авлига газар авсан тул эрх мэдэл дэх холбоо сүлбээгүйгээр бизнес явуулах бараг боломжгүй байдаг аж. Хэдийгээр Вэн Зябаогийн нэр түүний гэр бүлийн өв хөрөнгө дээр байдаггүй ч эхнэр Жан Бэйли нь үнэт эдлэлийн компанийнхаа амжилтын ачаар “Очир эрдэнийн хатан хаан” хэмээх гуншинтай болсон юм.Тэгвэл хүү Вэн Юнсун нь эд хөрөнгөөрөө Хонконг, Сингапурын магнатуудтай эн зэрэгцэх болсон байна. Wikileaks сайт 2007 онд задруулсан нэгэн дипломат нууц мэдээлэлд “Вэн Зябао гэрбүлийнхээ бизнес, “мөнгөний дайн”- д дургүйцэж, эхнэрээсээ салах тухай хүртэл бодож байсан. Гэвч чадаагүй, тэдний бизнесийг зогсоохыг хүсээгүй” хэмээсэн байдаг.

Авлига, хээл хахуулийн эсрэг байнга чанга хатуу дуугардаг Вэн даргын гэр бүлийн хөрөнгө чинээний шуугиан Weido сайт дээр (Twitter-ийн хятад хувилбар гэж хэлж болно) хамгийн их эрэлт, хандалттай байсан юм. Эрх баригчид “Вэн”, “2.7 тэрбум” зэрэг үгсийн хайлтад бүслэлт хийн зогсоохоос өмнө эдгээр үгс хамгийн их “моодонд орж” байлаа. Одоо Вэн дарга болон бусад удирдагч энэ мэдээлэлд ямар хариу, “цочрол” өгөх нь ихээхэн сонирхолтой үлдлээ.

Вэн Зябаогийн хөрөнгө чинээ Хятадад шуугиан тарилаа