УИХ-ын чуулганы баасан гаригийн үдээс хойших хуралдаанаар "Хүний хөгжил сангаас Монгол Улсын иргэнд 2012 онд хүртээх хишиг, хувийн хэмжээг тогтоох тухай" тогтоолын хэрэгжилтийн талаар гишүүн Г.Уянгаас Сангийн сайдад тавьсан асуулгын хариуг сонсов. Уг сангаас иргэн бүрт 1.5 сая төгрөг олгохоор болсны 500.000 төгрөгийг бэлнээр, cap capaap хуваан олгож дуусгасан. Үлдсэн сая төгрөгийг оюутнууд, мөн экс Сангийн сайд Д.Хаянхярваагийн сонгогдсон тойргийнхон л бүтнээр нь авсан билээ. Улсын хэмжээнд 2012 оны зургаадугаар сарын 30-ны өдрийн байдлаар бичгээр хүсэлт гаргасан нийт 279.4 мянган иргэнд 660 мянган төгрөг, 27.5 мянган иргэнд 1.0 сая төгрөгийг 5, 6 дугаар саруудад олгосон байна. Бусад ахмад настан, хөгжлийн бэрхшээлтэй иргэд 660 мянган төгрөгөө авсан, үлдсэнийг нь хэзээ өгөх талаар Сангийн сайд Ч.Улаан "Хүний хөгжил санд батлагдсан урьдчилгаа төлбөрийн орлого тасарсан, ногдол ашгийн орлого төвлөрөөгүй зэрэг шалтгааны улмаас гурав дахь ээлжийн 340 мянган төгрөгийг бүрэн олгож чадаагүй байгаа. 2012 оны эхний зургаан сарын гүйцэтгэлээр тус санд урьдчилгаа төлбөр 312 тэрбум төгрөг төвлөрөхөөс 80.0 тэрбум төгрөг төвлөрөв гэжээ.

Тавантолгойн ордоос орлого олохоор төлөвлөсөн нь бүтэлгүйтэж ийм байдалд хүргэсэн аж.

Сангийн орлогыг Засгийн газрын бонд гаргах замаар төвлөрүулэхээр хуулийн төсөл өргөн барьсныг УИХ хараахан шийдээгүй байгаа гэнэ. Уг асуудлыг УИХ шийдчихвэл дутуу мөнгийг ондоо багтаан олгохын төлөө ажиллахаа тэр хэлэв.