УИХ-ын намрын ээлжит чуулган завсарлав. Цагийг нь тулгаж байж, яаруу сандруу хэдэн хууль баталж гаргалаа. Хөгжлийн банк байгуулах асуудал нэлээд маргаан тариад авсан. Хаврын чуулганаар хэлэлцэхээр чухалд тооцогдох олон асуудал үлдээлээ. УИХ-ын гишүүд намрын чуулганд ямар дүн тавьж буйг тодрууллаа.

Аюулгүй байдал, гадаад бодлогын байнгын хорооны дарга Я.БАТСУУРЬ:
-Мэдээж олон хууль төлөвлөсөн ч ихэнхийг нь баталж чадсангүй. Завсраар нь төлөвлөгөөнд ороогүй олон хуулийн төсөл орж ирлээ. Аюулгүй байдал, гадаад бодлогын байнгын хороо хэлэлцэх ёстой хуулиудаа бараг бүгдийг нь хэлэлцсэн. Тагнуулын тухай хуулийг л батлуулж чадсангүй. Ардчилсан намын бүлгээс завсарлага авсан юм. Мөн хоёр хуулийг хэлэлцүүлгийн явцад санаачлагч нь татаж авсан учраас хойшлуулсан. Харин сонгуулийн хуулийн хувьд тогтолцоон дээрээ хоёр намын бүлэг тохиролцож чадаагүй учраас ажлын хэсэг байгуулаад ажиллаж байна. Ямар хэлбэрээр сонгуулиа явуулахаа сайтар ярилцах хэрэгтэй.