Сангийн сайд С.Баярцогт өнөөдөр /2011.04.26/ Засгийн газраас санаачлан боловсруулсан УИХ-ын тогтоолын төслийг УИХ-ын дарга Д.Дэмбэрэлд өргөн мэдүүллээ.

“Импортын барааны гаалийн албан татварын хувь, хэмжээг батлах тухай” УИХ-ын 1999 оны 27 дугаар тогтоолын хавсралтад өөрчлөлт оруулах тухай тогтоолын төслийг мөн өргөн барилаа.

Дотоодын хүнсний болон өрхийн аж ахуйн үйлдвэрлэлийг дэмжих, нэгэнт бий болсон ажлын байрыг хадгалах, нэмэгдүүлэх, хүнсний аюулгүй байдлыг хангах зайлшгүй шаардлагатайг харгалзан сонгино, байцаа, шар лууван, шар манжингийн гаалийн албан татварын хувь хэмжээг Баян-Өлгий аймгийн Цагааннуур, Ховд аймгийн Ярант, Увс аймгийн Боршоо, Завхан аймгийн Арц суурь, Говь-Алтай аймгийн Бургастай боомтоор 7 дугаар сарын 1-нээс 4 дүгээр сарын 1 хүртэл 15 хувь, 4 дүгээр сарын 1-нээс 7 дугаар сарын 1 хүртэл 5 хувь, бусад боомтоор импортолсон бол жилийн турш 15 хувь байхаар дээрх тогтоолын төсөлд тусгажээ.

2010 оны ургацын дүнгээр хүн амын хэрэгцээт гурилын 100 хувь, хүнсний ногооны 53.7 хувийг дотоодын ургацаас хангах боломжийг бүрдүүлсэн байна.

Төмс, хүнсний ногооны үйлдвэрлэл эрхлэгчдээс тавьж байгаа гаалийн албан татварыг нэмэгдүүлэх саналыг судлан санал боловсруулах арга хэмжээ авахыг “Засгийн газарт чиглэл өгөх тухай” Монгол Улсын Ерөнхийлөгчийн 2010 оны 11 дүгээр сарын 29-ний өдрийн 250 дугаар зарлигаар Засгийн газарт чиглэл өгсөний дагуу уг тогтоолын төслийг санаачлан боловсруулсан байна.