Намуудын сонгуулийн амлалтыг хэрэгжүүлэх зорилгоор энэ оны нэгдүгээр сараас эхлэн амьжиргааны баталгаажих төвшнөөс доогуур орлоготой өрхийн гурав ба түүнээс дээш хүүхдэд сар бүр 3000 төгрөг олгохоор Засгийн газрын мөрийн хөтөлбөрт тусгасан билээ. Үүнийг хуульчлах зорилгоор Нийгмийн халамжийн тухай хуульд нэмэлт өөрчлөлт оруулахаар Засгийн газар хуулийн төсөл боловсруулжээ. УИХ-ын даргад өргөн барьсан энэхүү төслийг чуулганы нэгдсэн хуралдаанаар хэлэлцэх талаар Нийгмийн бодлогын байнгын хорооны өчигдрийн хурлаар авч хэлэлцлээ. НХХ-ийн сайд Ц.Баярсайханы танилцуулснаар, Нийгмийн халамжийн тухай хуулийн 16 дугаар зүйлд заасан "Төрүүлж, өсгөж хүмүүжүүлж байгаа 16 хүртэлх насны дөрөв ба түүнээс дээш хүүхэдтэй өрхийн эх (эцэг) жил тутам олон хүүхэдтэй тэтгэмж авах эрхтэй" гэсэн заалтыг "амьжиргааны баталгаажих төвшнөөс доогуур орлоготой, 0-18 хүртэлх насны гурван ба түүнээс дээш хүүхэдтэй өрхийн эх (эцэг, хууль ёсны асран хамгаалагч, харгалзан дэмжигч) сар тутам хүүхдийн мөнгөн тэтгэмж авах, нэг хүүхдэд ногдох тэтгэмжийн хэмжээ сар бүр 3000 төгрөг байна" гэж өөрчилсөн. Бас үүнийг олгох журмыг Засгийн газар батлахаар боллоо гэв. Нийгмийн бодлогын байнгын хорооныхон энэхүү хуулийн төсөлд зарим нэг зарчмын өөрчлөлт оруулан УИХ-ын чуулганы нэгдсэн хуралдааны анхны хэлэлцүүлсээр баталъя гэв.