Өөрөөр хэлбэл УИХ-ын гишүүн Ц.Баярсайхан, Х.Бадамсүрэн нар Ерөнхийлөгч, УИХ-ын дарга, Ерөнхий сайд нарт хандан нэгэн хүсэлт тавьжээ. Тэд хүсэлтдээ “Өмнөговь аймгийн нутаг дэвсгэрт нээгдсэн орд газруудыг ашиглахын тулд дэд бүтцийн асуудлыг хамгийн эхэнд шийдвэрлэх шаардлагатай байна. Өнгөрсөн онд УИХ-ын 47 дугаар тогтоол гарч, өөрийн хөрөнгөөр гүйцэтгэн дараа төлөгдөх нөхцөлтэйгөөр барих байгууламжийн жагсаалт батлагдсан байгаа.

Мандалговь-Тавантолгой-Оюутолгойн 220 квт-ын эрчим хүчний шугам, Улаанбаатар-Мандалговь-Даланзадгад, Даланзадгад-Тавантолгой-Оюутолгойн авто замыг барих асуудал уг тогтоолд тусгагдсан. Монгол улсын засгийн газар Нарийн сухайт-Шивээхүрэн, Тавантолгой-Гашуун сухайтын төмөр зам барих зөвшөөрлийг холбогдох компаниудад олгож, тодорхой хугацааны дараа 51 хувийг төрд шилжүүлэхээр шийдвэрлэсэн байгаа. Дээрх шийдвэрийн дагуу төмөр замын гэрээнүүдийг Төмөр замын газар эцэслэн байгуулж, холбогдох зөвшөөрлийг олгосон. Гэтэл дээрх ажлууд зогсонги байдалд орж, ахиц өөрчлөлт гарахгүй байна. Авто зам барих ажлыг эхлүүлэхгүй, төмөр зам тавих асуудалд зарим байгууллага, албан тушаалтны зүгээс элдэв дарамт, шахалт үзүүлж саатуулсаар байгааг ойлгохгүй байна.