Монгол Улсын тэргүүн шадар сайд Н.Алтанхуяг  энэ сарын 1-4-ний өдөр БНХАУ-д албан ёсны айлчлал хийлээ.

Хятадын Жилин мужийн Чан чун хотод болсон Зүүн хойд Азийн худалдаа, эдийн засгийн хамтын ажиллагааны дээд хэмжээний чуулга уулзалтад оролцсон Монголын төлөөлөгчдийг Тэргүүн Шадар сайд ахалж, УИХ-ын гишүүн эдийн засгийн байнгын хорооны дарга Ц.Баярсайхан, Зам тээвэр барилга хот байгуулалтын дэд сайд Т.Пүрэвдорж, Эрдэс баялаг эрчим хүчний дэд сайд Х.Ариунсан нарын арав гаруй төлөөлөгч оролцжээ.

Энэ үеэр Тэргүүн Шадар сайд Н.Алтанхуягийг Жилин мужийн намын хорооны нарийн бичгийн дарга Сун Жэнцай, БНХАУ-ын улс төрөөр зөвлөлдөх зөвлөлийн дэд дарга Ван Ган, Хятадын коммунист намын гадаад харилцааны газрын дарга нар тус тус хүлээн авч уулзсан байна. Тэргүүн шадар сайд Н.Алтанхуяг Зүүн хойд Азийн чуулга уулзалтад тавьсан илтгэлдээ Монгол Улс хөгжлийнхөө алтан үе дээр ирээд буйг онцлон дурдав.

Мөн уул уурхай, дэд бүтэц шинэ төмөр зам, боловсруулах үйлдвэрүүд, Сайншандын аж үйлдвэрийн цогцолбор зэргийг ойрын үед бүтээн байгуулахаар төлөвлөж буй бөгөөд энэ бүхэнд хөрөнгө оруулалт хийхийг гадаадын хөрөнгө оруулагчид бизнесменүүдэд уриаллаа.