Монгол Улсын Ерөнхийлөгч Ц.Элбэгдорж Щвейцарийн Давос хотноо дэлхийн эдийн засгийн чуулга уулзалтад оролцож байна. Тэрбээр чуулга уулзалтын гурав дахь өдөр буюу өнгөрсөн ням гарагт «Арабын хаврын геополитикийн нөлөө» дэл-хийн эдийн засгийн удирдагчдын албан бус цугларалтад оролцож, үг хэлэв.

Ерөнхийлөгч Ц.Элбэгдорж хэлсэн үгэндээ «Хувьсгал бол нэг даргаас нөгөөд эрх мэдэл шилжих ойлголт биш. Даргын эрх мэдэл, шийдвэр гаргах боломж иргэдийн гарт очих явдал юм. Тиймээс бидэнд бусдад заах туршлагаас илүү бусадтай хуваалцах сургамж олон бий» гэв.

Харин НҮБ-ын Ерөнхий нарийн бичгийн дарга асан Кофи Аннан «Арабын хувьсгалын дүнд маш олон улс иргэний дайны хэмжээнд хүрээд байна. Бид Ливи болон Сирийн жишээнээс үүнийг харж болно.

Гэтэл та бүхэн Монголыг хар. Тэд 20 гаруй жилийн өмнө тайван замаар социалист нийгмийн тогтолцооноос ардчилсан нийгэмд шилжиж, ямар ч дайн байлдаад автаж ард, тумнээ хохироогоогүй» хэмээгээд улмаар Ардчилсан орнуудын хамтын нийгэмлэгийг тэргүүлж байгааг онцоллоо.

Финландын тэргүүн Саули Нийнистотой уулзаж, санал солилцлоо

Ерөнхийлөгч Ц.Элбэгдорж дэлхийн эдийн засгийн чуулга уулзалт болж буй Щвейцарын холбооны улсын Ерөнхийлөгч Уэли Маурертай уулзаж, туршлага солилцлоо.

Уулзалтын эхэнд Щвейцарийн Ерөнхийлөгч «Хорин жилийн өмнө Монголын тухай сайн мэддэггүй байсан. Харин одоо Монгол Улс дэлхий нийтийн анхаарлын төвд байна. Монгол бол гүн гүнзгий түүхийн сурвалжтай, үнэхээр сонирхол татсан орон» гэв.

Ингээд хоёр орны тэргүүн Монгол Улс дахь иргэний оролцооны тухай, шууд ардчиллын сургалтууд болон иргэд нь төсвөө хянаад, захиран зарцуулах шийдвэрээ хуулиар олж авсан талаар санал солилцсон юм.

Уулзалтын үеэр хөндөгдсөн нэг зүйл бол усны менежментиин асуудал байв.

Энэ талаар Ерөнхийлөгч «Хүн амын 40 орчим хувь нь нийслэл хотдоо суурьшсанаас үүдэн олон жилийн хөрсний бохирдол нь гүний усны нөөцөд заналхийлж байгаа нь энэ салбар дахь хамтын ажиллагаа, дэмжлэг тусламж их хэрэгтэйг харуулж байна» хэмээн хэллээ.

Дараа нь Ерөнхийлөгч Ц.Элбэгдорж дэлхийн эдийн засгийн удирдагчдын «2013 онд тулгамдаж буй асуудлуудыг тодорхойлох нь», «2015 оноос хойш бидний хүсч буй ирээдүй» болон аюулгүй байдлын асуудлаарх уулзалтуудад тус тус оролцсон. Түүнчлэн Финланд улсын Ерөнхийлөгч Саули Нийнистотой уулзаж, санал солилцов.

Энэ үеэр Ерөнхийлөгч Ц.Элбэгдорж хоёр жилийн өмнө Финланд улсад айлчилж байснаа дурсаж, хоёр талын харилцаа, хамтын ажиллагаа өргөжин хөгжиж буйд сэтгэл өндөр байгаагаа илэрхийлсэн юм.

Мөн Монголд тоо толгой нь өдрөөс өдөрт цөөрсөөр буй цаа бугыг өсгөх, үүлдэр угсааг сайжруулах талаар ярьсан зүйлээ хэрхэн хэрэгжүүлэх тухай санал солилцсон байна.