2013.05.02

Улаанбаатарыг тойруулаад үнээний ферм байгуулна

Үйлдвэр, хөдөө аж ахуйн сайд ХБаттулга, дэд сайд Ц.Туваан тэргүүтэй албаны хүмүүс Байгаль орчин, хүнс хөдөө аж ахуйн байнгын хорооны хуралдаанд оролцов.

Тэд эдийн засаг, нийгмийг 2012 онд хөгжүүлэх үндсэн чиглэлийг хэрэгжүүлэх төлөвлөгөөнд тусгагдсан Үйлдвэр, хөдөө аж ахуйн салбарын зорилт, арга хэмжээний тухай мэдээлэл өгсөн юм.

Төлөвлөгөөнд тусгагдсан ажлуудын ерөнхий гүйцэтгэл 88.1 хувьтай гарсан бөгөөд тасарсан арга хэмжээ байхгүй гэнэ. Мөн малын гоц халдварт өвчний тархалт хяналтыг тогтмолжуулж, эрсдэл бүхий бүс нутгийн мал сүргийг урьдчилан сэргийлэх арга хэмжээнд хамруулж, үр дүнг сайжруулах чиглэлээр олон арга хэмжээ авсан гэв.

Нийтдээ 393.5 мянган га-д тариалалт хийж, ирэх намар 487 мянган тонныг хураан авахаар ажиллаж байна

Үр дүнд нь өвчний гаралт 1168, өвчилсөн малын тоо 76543 тоо толгойгоор буурчээ. Мөн шүлхий өвчнөөс урьдчилан сэргийлэх арга хэмжээнд долоон аймгийн 21.2 сая мал хамруулсан гэдгийг хэллээ. Түүнчлэн буудайн үрийг дотооддоо 100 хувь хангах боломж бийг онцолж, энэ оны зорилтоо дурдав. Тухайлбал, 313.7 мянган га талбай дулаан буудай, 7.6 мянган га-д хүнсний ногоо, 20.7 мянган га-д малын тэжээл тэргүүтэй хүнсний бүтээгдэхүүнийг бэлтгэхээр төлөвлөсөн байна. Нийтдээ 393.5 мянган га-д тариалалт хийж, ирэх намар 487 мянган тонныг хураан авахаар ажиллаж буй гэнэ.

Хуралдааны үеэр байнгын хорооны гишүүд нийслэл  болон томоохон хотуудад м хангамж ямар байсныг тодруулж байв. Хариуд нь Х.Баттулга сайд махтай холбоотой асуудлыг үе үеийн Засгийн газарт байдаг хэмээсэн. Мөн хаврын мал төллөлтийн үеэр үнийн хөөрөгдөл нэмэгддэг гэдгийг ч дуулгасан юм. Харин өнөө жил өнгөрсөн жилүүдийнхээс өөр онцлогтой ажиллаж буй аж.

Өдөрт 100 тонн орчим мах зарагдаж байгаагийн 90 орчим тонн нь тухайн нөөцөлсөн мах гэнэ.

Тодруулбал, 80 орчим тэрбум төгрөгөөр мах худалдаж аваад нөөцөлсөн байна. Тэр нөөцөлсөн махаараа нийлүүлэлт хийж байгаа. Өдөрт 100 тонн орчим мах зарагдаж байгаагийн 90 орчим тонн нь тухайн нөөцөлсөн мах гэнэ. Хэрэв мах нөөцлөгдөөгүй бол нийлүүлэлтээсээ болж үнэ нь нэлээн өсөх магадлалтай байжээ. Харин цаашид хот суурин төвлөрсөн газруудад үхрийн фермерүүдийг дэмжих бодлого гаргаж ажиллах гэнэ.

Товчоор хэлбэл Улаанбаатарыг тойрсон 300-350 үхэртэй, сүү махны чиглэлийн фермерүүдийг бий болгох юм. Түүнчлэн хөгжилтэй орнуудын махны үнээ барьдаг аргатай уялдаж ажиллах зорилттой байгаа бөгөөд энэ тухай төслөө Засгийн газарт танилцуулжээ. Харин Байгаль орчин, ногоон хөгжлийн сайд С.Оюун өнгөрсөн онд эдийн засаг, нийгмийг хөгжүүлэх үндсэн чиглэл, байгаль орчныг хөгжүүлэх зорилт арга хэмжээний хүрээнд зарим ажлын явцтай танилцаж, 84 хувийн биелэлттэй байгааг хуралдааны үеэр мэдээлсэн.