УИХ дахь МАН-ын бүлэг ээлжит хуралдаанаараа хэд хэдэн асуудал хэлэлцжээ. Тэд Ерөнхийлөгчийн сонгуультай холбогдуулан УИХ-ын хаврын чуулганыг түр завсарлуулах шаардлагагүй гэж үзсэн байна.

УИХ-ын чуулган болон Байнгын хороодын хуралдаанаар хэлэлцэх асуудлуудаас Компанийн тухай хуульд өөрчлөлт оруулах хуулийн төслийг дэмжиж, батлуулах нь зүйтэй гэдэгт санал нэгдсэн аж.

УИХ-ын гишүүн С.Ганбаатарын санаачилсан эл хуулийн төсөл хувьцаат компаниудын цөөн тооны хувьцаа эзэмшдэг иргэдийн эрх ашгийг хамгаалах агуулгатай.

Хууль зүйн байнгын хороо болон УИХ-ын чуулганаар Мөрдөх албаны тухай хуулийн төслийг хэлэлцэхтэй холбоотой МАН-ын бүлгийн дарга, УИХ-ын гишүүн Н.Энхболд "Хуулийн байгууллагад хийх шинэчлэлийг манай бүлэг дэмжиж байгаа.

Гэхдээ зөв дэс дараалалтай явах хэрэгтэй. Эхлээд Эрүүгийн хууль, Эрүүгийн байцаан шийтгэх тухай хууль гээд суурь хуулиа эхэлж хэлэлцэх шаардлагатай. Тийм учраас хууль зүйн салбарыг шинэчлэхтэй холбоотой хуулийн төслүүдийн дарааллыг зөв тогтоох шаардлага тавина.

Хэрэв суурь хуулиудыг оруулж ирэхгүй бол энэ хуулийг хэлэлцэх боломжгүй. Тиймээс манай бүлэг шаардлагатай бол завсарлага авна" хэмээн байр сууриа илэрхийллээ.

"Эрдэнэс Таван Толгой" компанийн Тендерийн үнэлгээний хорооны дарга болон гишүүдэд Авлигатай тэмцэх газраас эрүүгийн хэрэг үүсгэхээр болсон.

УИХ-ын гишүүн Н.Номтойбаяр "Эрдэнэс Таван Толгой" компанийн Тендерийн үнэлгээний хорооны дарга болон гишүүдэд Авлигатай тэмцэх газраас эрүүгийн хэрэг үүсгэхээр болсон тухай мэдээлэл өгөв.

Тэрээр "Монгол Улсын Ерөнхий сайд Н.Алтанхуягийг огцруулах асуудлыг тавих үеэр зарим нэг мэдээллийг тодруулах шаардлага гарсан. Үүний нэг нь "Эрдэнэс Таван Толгой" компанитай холбоотой тендерийн асуудал.

МАН-аас гурван хүний бүрэлдэхүүнтэй ажлын хэсэг энэ компанийн үйл ажиллагаа ялангуяа, зарим нэг тендерийн асуудлыг шалгахад нөлөө бүхий албан тушаалтан хууль зөрчсөн, албан тушаалаа урвуулан ашигласан байж болзошгүй үйлдэл илэрсэн.

Энэ дагуу манай намын бүлгээс хэд хэдэн газарт албан тоот илгээсэн. Зарим байгууллагаас хуулийн хугацаанд бидэнд хариу ирүүллээ. Тухайлбал, энэ асуудлыг шалгаж өгөөч гэж АТГ-т хандсан.

Энэ байгууллагаас "Эрдэнэс Таван Толгой" компанийн Тендерийн үнэлгээний хорооны дарга, гишүүдэд эрүүгийн хэрэг үүсгэхээр материалаа Нийслэлийн прокурорын газар хүргүүлсэн гэсэн албан бичиг ирүүлсэн" гэлээ.