2013.06.25

Сэлбэ голын эрэг дагуулан тавих хурдны замын ажил наадмын дараа эхэлнэ

Улсын хэмжээнд өрнөж буй бүтээн байгуулалтын талаар даваа гариг бүрийн 15 цагт Засгийн газраас олон нийтэд тогтмол мэдээлж байхаар болжээ. Үүний эхнийх нь өнөөдөр "Бүтээн байгуулалтын цаг" нэртэйгээр боллоо.

Уулзалтын эхэнд Ерөнхий сайд Н.Алтанхуяг энэ талаар товч мэдээлэл хийсэн бөгөөд энэ удаагийн уулзалтад Эдийн засгийн хөгжлийн сайд Н.Батбаяр, Барилга, хот байгуулалтын сайд Ц.Баярсайхан, Зам тээврийн сайд А.Гансүх, Эрчим хүчний сайд М.Сономпил, Нийслэлийн Засаг даргын орлогч Н.Гантөмөр болон ажил хариуцсан албаны хүмүүс оролцсон юм.

Албаны хүмүүсийн өгсөн мэдээллээр бол 2012-2016 онд 12 аймгийг нийслэлтэй хатуу хучилттай авто замаар холбохоос энэ жил зургаан аймгийн замыг дуусгах ёстой. Дундговь, Дорноговийн Замын-Үүд, Өмнөговь хүрэх замууд хамгийн эрчимтэй урагшилж байгаа ажээ. Түүнчлэн Дорнод, Сүхбаатар зүүн аймгийг холбох зам хуваарийн дагуу саадгүй явж байгаа юм байна.

Баянхонгорын замыг наадмын дараа ашиглалтад оруулна.

Харин Баянхонгорын замыг наадмын дараа гэхэд ашиглалтад оруулна гэж Зам тээврийн сайд А.Гансүх хэллээ. Мөн Булган-Хөвсгөл чиглэл дэх Уньтын зам ахиц муутай байгааг Ерөнхий сайд шүүмжилж, хариуцсан компани гэрээт ажлаа хийж чадахгүй бол даруйхан Засгийн газрын хуралдаанаар оруулж шийдвэрлүүл гэдэг үүргийг Зам тээврийн сайдад өгч байв.

Төмөр замын бүтээн байгуулалтын тухайд Тавантолгойгоос Гашуунсухайт хүртэлх 267 км төмөр замын доод суурийн ажил 20 хувийн гүйцэтгэлтэй явж байгаа бөгөөд ирэх жил үндсэн ажлыг эхлүүлнэ гэж Зам тээврийн сайд энэ үеэр хэллээ.

Барилга, хот байгуулалтын сайд Ц.Баярсайхан:

Орон сууцны 8 хувийн хүүтэй зээл олгож эхэлснээс хойшхи долоо хоногийн хугацаанд 6100 иргэн өндөр хүүтэй зээлээс шилжиж, шинээр 146 иргэн зээлээ авсан бол 100 мянга гаруй иргэн банкуудад хандаад байгаа юм байна. Жилийн 16-19 хувийн хүүтэй зээлтэй өрх 8 хувьд шилжүүлснээр сарын төлбөр нь 370-750 мянган төгрөгөөр хумигдаж байгааг Барилга, хот байгуулалтын сайд Ц.Баярсайхан онцоллоо.

Эрчим хүчний сайд М.Сономпил:

ТЭЦ-3, ТЭЦ-4, ТЭЦ-5, Тавантолгойн станцуудын ажил графикийн дагуу явагдаж байгаа.  Өнгөрөгч сард ажлыг нь албан ёсоор эхлүүлсэн Амгалангийн ДЦС-ын хувьд газар чөлөөлөлтийн асуудал бэрхшээл үүсгэж байгаа ч 7 дугаар сарын 1 гэхэд айл өрхүүдтэй гэрээлж дуусгахаар зорьж байна.

Ингэснээр намар гэхэд газрынхаа 50 хувийг чөлөөлж, барилгын ажил эхлэх бололцоо нөхцөл бүрдүүлнэ. Нийслэлийн дулааны ачаалал үүрэлцэх энэ станц ирэх оны 8 дугаар сард ашиглалтад орох ёстой гэж Эрчим хүчний сайд М.Сономпил мэдээлэв.

Баянзүрхийн товчооноос 22-ын товчоо хүртэл Туул голын хойд эргээр тавих хурдны замын зураг төсөл нь бэлэн болжээ.

Нийслэлд өрнөөд буй "Гудамж" төслийн хүрээнд гурван чиглэлд бүтээн байгуулалт хийж буй. Энэ онд багтаан хотын төвийн 33 уулзварыг шинэчилж дуусгахаас одоогийн байдлаар эхний хоёр уулзварыг ашиглалтад оруулаад байгаа билээ. Цаашид 7-10 хоног тутамд нэг уулзвар шинэчлэгдэх юм байна.

Баянзүрхийн товчооноос 22-ын товчоо хүртэл Туул голын хойд эргээр тавих хурдны замын тухайд зураг төсөл нь бэлэн болжээ. Мөн Нарны замаас Хандгайт хүртэл Сэлбэ голын эрэг дагуулан тавих хурдны замын ажлыг наадмын дараа эхлүүлнэ гэж Эдийн засгийн хөгжлийн сайд Н.Батбаяр энэ үеэр хэлж байв.

Хөрөнгө санхүүгийн асуудлаас үүдэн гурван жил дамнан сунжирсан 22-ын товчооны замын тухайд наадмаас өмнө ашиглалтад ажээ. Харин Нисэхийн замыг намар гэхэд дуусгахаар ажиллаж байгаа тухай "Бүтээн байгуулалтын цаг" анхны уулзалтын үеэр албаны хүмүүс мэдээллээ.