Үйлдвэр хөдөө аж ахуйн яамнаас “Монгол улсын малчин” үнэмлэх, энгэрийн тэмдэг олгох ажлыг улс, орон даяар зохион байгуулж дууссан байна.

Манай улсын хэмжээнд нийт 300 гаруй мянган малчид байдаг бөгөөд 91 хувь нь энэхүү үнэмлэхийг аваад байгаа аж.

Мал аж ахуйн үйлдвэрлэл эрхлэгчдийн үйл ажиллагааг дэмжих, малчдын хөдөлмөрийг албан ёсоор баталгаажуулах, бэлтгэн нийлүүлж байгаа бүтээгдэхүүн, түүхий эдийн гарал үүсэл, чанарыг баталгаажуулах, ХАА-н биржээр дамжуулан борлуулах нэгдсэн сүлжээнд хамруулахад тухайн бүтээгдэхүүний гарал, үүсэл, эзнийг нь тодорхой болгох зорилгоор явуулж буй үйл ажиллагааны хүрээнд ийнхүү үнэмлэх олгож буй юм.

Малчид

Малчид өөрийн гэсэн үнэмлэхтэй болсноор тусгай статустай болж, төрийн дэмжлэг хүртэх боломж нээгдэх бөгөөд захын малчин хүн хангай дэлхийгээ ажиглан байгаль цаг уураа шинжихийн сацуу малаа өөрсдөө эмчилж, сүү цагаан идээгээ боловсруулж байдаг учир яах аргагүй мэргэжил мөн гэдгийг албаныхан хэлж байлаа.

Түүнчлэн манай улсын хувьд малчин гэж хэнийг хэлэх вэ гэдэг тодорхойлолт өнөөг хүртэл аль ч хууль эрхзүйн актад тусгаагүй учир мэргэжилнүүд хуулийн төсөл боловсруулж эхэлсэн байна.

Мөн малчин өрхүүдийг үндэсний жижиг, дунд үйлдвэрлэгчийн гэрчилгээ, тамга, тэмдэгтэй болгох ажлын бэлтгэл хангагдаад байгаа талаар ҮХААЯ-наас мэдээллээ.

Малчдыг мэргэжлийн үнэмлэхтэй болгох ажил 91 хувьтай байна