Монгол Улсын Ерөнхий сайд Н.Алтанхуягийн ивээл дор түүхч, угсаатны зүйч, генетикч, антропологич, археологич, хэл шинжээч 15 эрдэмтнээс бүрдсэн баг “Монголчуудын гарал, Монгол угсаатан бүрэлдсэн нь” төсөл хэрэгжүүлж эхэллээ.

Монголчууд 2200 гаруй жилийн төрт ёсны түүхтэй, Азийн өвөг ард түмэн бөгөөд Монгол орон нь эртний хүмүүсийн амьдарч, аж төрсөөр ирсэн өлгий нутгийн нэг юм. Сүүлийн үеийн судалгаагаар Монгол нутагт наад зах нь 800 000 жилийн өмнөөс хүн суусан нь тогтоогдоод байгаа.

Гэтэл Монголчуудын угсаа гарал, монгол угсаатан хэрхэн үүсэж бүрэлдсэн талаар гаднын зарим судлаачдын дүгнэлтийг эс тооцвол цэгцтэй ойлголт байдаггүй.

Аливаа ард түмний угсаа гарал, угсаатан болж бүрэлдсэн асуудал бол тухайн ард түмний түүх, угсаатан судлалын тулгуур сэдэв бөгөөд уг асуудлыг тодруулснаар цаашдын судалгааны олон чиглэл салаалан хөгждөг.

Төсөл хэрэгжсэнээр Монголчуудын гарал, Монгол угсаатан хэрхэн бүрэлдсэн тухай үндэсний эрдэмтдийн боловсруулсан шинжлэх ухааны шинэ үзэл баримтлал бий болно.

Тиймээс гарал угсаатны үүсэл хөгжлийг шинжлэн тодруулах нь Монгол үндэстний түүхийг шинээр авч үзэхэд чухал ач холбогдолтой гэж эрдэмтдийн баг үзэж байна.

Ерөнхий сайд Н.Алтанхуяг “Монголчуудын гарал, Монгол угсаатан бүрэлдсэн нь” төслийн багийн эрдэмтдийг хүлээн авч уулзах үедээ энэ төсөл хэрэгжсэний үр дүнд Монголчуудын гарал, Монгол угсаатан хэрхэн бүрэлдсэн тухай үндэсний эрдэмтдийн боловсруулсан шинжлэх ухааны шинэ үзэл баримтлал бий болно.

Энэхүү үзэл баримтлал нь бүх шатны сургуулийн сурах бичиг, гарын авлага, сургалтын агуулгын үндэс суурь болж өгөх ач холбогдолтой юм гэж хэллээ.

"Монгол угсаатан бүрэлдсэн нь” төсөл хэрэгжиж эхэллээ