МАХН-ын дарга Н.Энхбаярыг комд орсон гэх мэдээлэл цацагдаж, Эрүүл мэндийн сайд Н.Удвал өчигдөр 18.30 цагт шуурхай хэвлэлийн хурал зарлалаа. Энэ үеэр түүнээс цөөн асуултад хариулт авсан юм.

-Н.Энхбаярыг комд орсон гэх мэдээлэл цацагдаад байна. Энэ үнэн үү?

-Миний нэр дээр Сайд нарын хоёрдугаар эмнэлгээс албан бичиг ирсэн.  Тодруулбал, Н.Энхбаяр даргын биеийн байдал хүнд, аажим аажмаар дордож, амь насанд нь аюул учирч байгааг анхааралдаа авна уу гэсэн байсан. Н.Энхбаярын хувьд 2012 онд шүүхийн шийдвэрийн тогтоол гарч, өнгөрсөн хоёрдугаар сарын 26-наас хойш Сайд нарын хоёрдугаар эмнэлэгт эмчлүүлж байгаа.

-Өмнө ч гэсэн танайд албан бичиг ирж байсан биз дээ?

-Тийм. Нийт таван удаа бичиг явуулж байсан. Сүүлийн үед нойргүйтсэн, хоол идэх дуршилгүй, биеийн жингээ алдаж байгаа. 93 килограммаас 66 килограмм болтлоо турсан. Даралт нь их унаж байна. Эмчилгээ хийж байгаа боловч амь нас нь аюултай байгааг анхааралдаа авна уу гэсэн байна.

Мөн Н.Энхбаяр дарга өнгөрсөн дөрөвдүгээр сарын 28-нд ЭМЯ-ны мэдлээс гарсан. Энэ хугацаанд эмчилгээ хийж байгаа ч бие нь дээрдэхгүй байна. Тиймээс Эрүүл мэндийн яамнаас анхаарна уу хэмээн албан бичиг явуулсан юм билээ.

-Н.Энхбаярыг ялаас чөлөөлүүлэх хүсэлтийг холбогдох газарт хүргүүлж байсан. Тэр юу болсон бэ?

-Өнгөрсөн дөрөвдүгээр сарын 28-нд хүсэлт гаргасан. Одоо уг асуудал шүүх эмнэлэг дээр байгаа сурагтай. Эмч нар дүгнэлтээ гаргасны дараа шийдэгдэх юм шиг байна лээ. Манай яамны харьяа биш учраас сайн мэдэхгүй байна. Хууль зүй яамны харьяа комиссын эмч нарын дүгнэлтийг хүлээж байна.

-Өмнө нь таван удаа танайд бичиг хүргүүлж байсан. Тэгэхээр яагаад энэ удаад шуурхай хурал зарлах болов?

-Би арван хоног амрахаар болсон. Гэхдээ энэ амралтын хугацаанд юу ч болоо билээ. Юм гэдэг тоймгүй байдаг. Тэгэхээр олон нийтэд ийм мэдээлэл ирсэн гэдгийг хэлэх хэрэгтэй гэдэг үүднээс хэвлэлийн хурал зарлаж байгаа нь энэ.

-Тэгэхээр Н.Энхбаярын асуудлаар хэвлэлийн хурал зарлаж байгаа нь улс төртэй холбоотой юу?

-Би бол улстөрийн албан тушаалтан. Тэгэхээр намаа төлөөлөх эрх надад байна. Хүн чанарынхаа хувьд би хэвлэлийн хурал хийх эрхтэй.

-Тэгээд Н.Энхбаяр комд орсон гэх мэдээлэл үнэн үү?

-Яг энэ талаар ярих эрх надад байхгүй. Үүнийг эмчлэгч эмч нь ярина.