Японы Шизүока мужийн захирагч Хейта Квакацу энэ сарын 12-ноос эхлэн манай улсад айлчилж байгаа.

Түүний айлчлалын бүрэлдэхүүнд банк санхүү, барилга, ложистик, хөнгөн хүнсний үйлдвэр зэрэг салбарын 30-40 компанийн захирал багтсан бөгөөд эдийн засаг, хөрөнгө оруулалтын чиглэлээр Монголын талтай харилцаа холбоо тогтоох зорилготой байсан.

Шизүока муж нь Монголын Дорноговь аймагтай найрамдлын харилцаа тогтоож, жил бүр харилцан сурагч солилцдог. Энэ удаад Шизүока мужийн захирагчтай хамт 30 сурагч солилцооны хөтөлбөрийн дагуу Монголд ирсэн байна.

Эдгээр сурагчид өнгөрсөн баасан гарагт Япон хэлний сургалттай Шинэ Монгол дунд сургуультай очиж танилцсан бөгөөд энэ үеэр БШУ-ны сайд Л.Гантөмөр Шизүока мужийн даргатай уулзаж, цаашид боловсролын салбарт хэрхэн хамтарч ажиллах тухай ярилцжээ.