Улс эх орондоо хийж бүтээсэн олон зүйлтэй, үр удамдаа үлгэрлэн дуурайлгах сайхан түүхтэй ахмад буурлууд та бүхэндээ Олон улсын Ахмадын баярын өдрийг тохиолдуулан сэтгэл төвшин, санаа талбиун, эрүүл энх, урт удаан наслахын өлзийтэй ерөөлийг өргөн дэвшүүлье.

Манай  монголчууд эртнээс ахмад буурал, аав ээж, ах зах хүнийхээ үгийг сонсож, тэдний  захисан захиас, сургасан  сургаалиас  сэрэмж, санаа хоёрыг авч, зам мөрөө засаж явдаг сайхан уламжлалтай ард түмэн билээ.

Тийм ч учир Шинэчлэлийн Засгийн газар байгуулагдсан цагаасаа хойш ахмад буурлуудыгаа алжааж ядрахгүй, амар тайван амьдрахад чухал шаардлагатай олон ажлуудыг  санаачлан  хэрэгжүүлэхийн сацуу, юун түрүүн тэднийхээ бодол санаа, бухимдал гомдол, баяр талархал, бас шинэ шилдэг санал, санаачилгыг өдөр, минут алдалгүй сонсож, хэрэгжүүлж байх үүднээс 11-11 утсыг ажиллуулж  байгаа билээ.

Энэхүү утсанд ханддаг иргэдийн дийлэнх нь үр хүүхэд, улс орныхоо ирээдүйн сайн сайханд сэтгэл тавьсан ахмад буурлууд  байдаг бөгөөд бид та бүхнийхээ хэлж, захисан бүхнийг аавын сургааль алт, ээжийн сургааль эрдэм хэмээн ажил хэрэгтээ тусгаж байгаа билээ.    

Залхуу хүн завагт байгаа махандаа хүрдэггүй гэдэг. Тиймээс манай Шинэчлэлийн Засгийн газар айлаас эрэхээр авдраа уудал гэсэн зарчим баримтлан, залуучуудаа ажилтай, орлоготой болгохыг, гадаадаас авах биш өөрсдөө бүтээдэг болохыг эн тэргүүний зорилтоо хэмээн тодорхойлон ажиллаж байна.

Энгийн үгээр үр хүүхдийнх нь ажил амьдрал сайн сайхан явбал, настан буурлууд маань ч жаргана гэсэн үг. Хайр нь дотроо хал нь гаднаа Ахмад буурлууд та бүхний минь арван цагаан буян улам арвижиж, сүүн цагаан сэтгэлийн тань цацалд Монгол улс маань мандан бадрах болтугай.

Монгол Улсын Ерөнхий сайд                                  Норовын Алтанхуяг