Сайн дурын байгууллагууд 2013 оны шилдгүүдээ тодруулна
2013 оны 12-р сарын 5-нд болох Олон Улсын Сайн Дурынхны Өдрийг угтан Монголын Сайн Дурынхны Байгууллагуудын Сүлжээнээс Сайн дурын үйл ажиллагааны хөгжилд зохих хувь нэмэр оруулж, идэвхи санаачилга, зүтгэлтэй ажиллаж байгаа албан байгууллага,
хувь хүмүүсийг дэмжин урамшуулах, тэдний амжилт бүтээлийг олон нийтийн хүртээл болгон дэлгэрүүлэх, сурталчлах зорилгоор “2013 оны шилдэг сайн дурын үйлстэн” шалгаруулах арга хэмжээг зургаа дахь жилдээ зохион явуулах гэж байна.
Тус арга хэмжээ нь сайн дурынхны байгууллагуудыг чадавхижуулах, нийгэм дэх сайн дурынхны үнэлэмжийг өсгөх, нийтэд тустай төсөл хөтөлбөрийн үр ашгийг нэмэгдүүлэх, сайн дурынхны манлайлал, нийгмийн интерпренерүүдийг дэмжин хөгжүүлэхэд бодитой хувь нэмрийг оруулдаг.
Шалгаруулалтын зургаан номинаци:
1) 2013 оны шилдэг сайн дурын ажилтан
2) 2013 оны шилдэг сайн дурын зүтгэлтэн
3) 2013 оны шилдэг залуу сайн дурын ажилтан
4) 2013 оны шилдэг сайн дурын үйл ажиллагаа
5) 2013 оны шилдэг сайн дурын байгууллага
6) Сайн дурын үйлсийг дэмжигч 2013 оны шилдэг байгууллага
2012 оны "Шилдэг сайн дурын ажилтан" шагнал гардуулах үеэр
Дээрх зургаан төрлөөр шалгаруулалтыг явуулах ба шалгаруулалтанд Улаанбаатар хот болон Монгол улсын хэмжээнд сайн дурын үйл ажиллагаа явуулж буй төрийн болон төрийн бус байгууллага, олон улсын байгууллага, хувийн хэвшлийн аж ахуй нэгж, хувь хүмүүс оролцоно.
Шалгаруулалтыг төр, төрийн бус болон олон улсын байгууллагын төлөөллөөс бүрдсэн Комисс хийж дүнг 2013.12.05-нд Олон улсын сайн дурынхны өдрийн ёслолын үйл ажиллагаа дээр зарлана. Шалгаруулалтын материалыг 2013.11.20-ны дотор “Энхийн төлөө үйлчлэхүй” ТББ-н байранд хүлээн авна.
Оролцох сонирхолтой байгууллага, хүмүүс Сайн Дурынхны Байгууллагуудын Сүлжээний зохицуулагч байгууллага болох “Энхийн төлөө үйлчлэхүй” ТББ-ын доорхи хаягаар хандаж шалгаруулалтын удирдамж болон холбогдох материал, мэдээллийг авна уу.
Хаяг: Энхийн төлөө үйлчлэхүй ТББ (Чингэлтэй дүүрэг, 4-р хороо, 8/5 байр, 409 тоот)
Утас: 70149994, 99125953
Е-майл хаяг: tungaa@serviceforpeace.mn
