2013.10.24

Ц.Даваасүрэн: Хүнийг хардаж болох ч худал гүтгэж болохгүй

УИХ дахь бие даагч гишүүд, УИХ-ын гишүүн Ц.Нямдоржийг хүн гүтгэсэн хэргээр шүүхэд өгөхөөр бэлтгэж байна.

Иргэний нисэхийн ерөнхий газар, Монголросцветмет нэгдэл, Дархан-Уул аймгийн ЗДТГ-т Ц.Даваасүрэн, С.Ганбаатар, Х.Болорчулуун гэсэн гишүүд өөрсдийн хүнээ удирдах албанд тавьсан хэмээн эрхэм гишүүн хэвлэлээр мэдэгдсэн юм.

Ашиг сонирхлын зөрчлийн тухай хуульд бүрэн хамаарч болох энэ баримтаа УИХ-ын ёс зүйн хороонд өгөлгүй, хэвлэлээр ярин улстөржсөнд Ц.Даваасүрэн гишүүн гайхаж байгаагаа илэрхийллээ. Хэрэв энэ асуудлаа нотлохгүй бол шүүхэд хандан нэр төрөө сэргээнэ гэдгээ Хөвсгөл аймгаас бие даан сонгогдсон эрхэм гишүүн хэлж байна.

УИХ-ын гишүүн Ц.Даваасүрэн: Өөрөө албан тушаалд хүрэхийн тулд шантаачилж, өөрийгөө үнэлдэг зүйл байдаг. Тэрэн шигээ бодож тийм зүйл гаргасан байна лээ. Өмнө нь дүүгээ гаалийн, татварын дэдээр тавьсан гэсэн огт ор үндэсгүй зүйл ярьсан. Миний хоёр дүү Хөвсгөлдөө бий.

Дарга нарын нохойд барьдаг мод болоод явж байдаг байсан.

Хэрвээ Иргэний нисэхийн ерөнхий газрын дарга, гааль, татварын дэдүүд ямар нэгэн байдлаар надтай төрөл садангийн, нутгийн, найз нөхөд гээд сонирхлын зөрчилтэй хүн байвал би ёс зүйн хариуцлага хүлээнэ. Хүнийг хардаж болно, харин худал гүтгэж болохгүй. Нэг өдөр шүүх дээр тайлбар хийх асуудал гарна. Амнаасаа болж байгаад хальтирчих вий дээ гэж хэлэх байна гэв. Түүнчлэн

-УИХ-ын гишүүн Ц.Нямдорж сүүлийн үед яагаад эрх баригчид руугаа хэтэрхий их дайраад байгаа юм бол? гэсэн асуултад,

-Намын их хурал дөхсөн болохоор тэгж байгаа юм. Намын их хурал дээр би л сүрхий тэдэнтэй үздэг хүн гэж өөрийгөө товойлгох гэж оролдож байна. Өөрийгөө нэр дэвшүүлэх ч юм уу даргын нэрэн дунд хавчуулж яваад удирдах зөвлөлд үлддэг арга нь л хэвээрээ явж байна.

Ер нь л шантаажаар амьдарч байгаад хэдэн удаа сайд хийчихсэн. Дарга нарын нохойд барьдаг мод болоод явж байдаг байсан. Тэр зан чанараараа бусдыг хардаж, төсөөлдөг болчихсон. Д.Тэрбишдагва гишүүн “Улс төрийн зөнөг гэж үүнийг хэлдэг юм” гэсэн шүү дээ гэлээ.