УИХ-ын гишүүн Д.Оюунхорол
2013.10.25

Д.Оюунхорол гишүүний асуултад хариулав

УИХ-ын чуулганы /2013.10.24/-ны нэгдсэн хуралдаанаар Монгол Улсын 2013 оны төсвийн тухай хуульд өөрчлөлт оруулах тухай, Нийгмийн даатгалын сангийн 2013 оны төсвийн тухай хуульд өөрчлөлт оруулах тухай, Хүний хөгжил сангийн 2013 оны төсвийн тухай хуульд өөрчлөлт оруулах тухай хуулийн төслүүдийн хоёр дахь хэлэлцүүлгийг хийлээ.

Хэлэлцүүлгийн үеэр УИХ-ын гишүүн Д.Оюунхорол:

Улсын төсвийн хөрөнгийг гадуур дураараа захиран зарцуулах эрхийг эрх баригчдад олгомооргүй байна. Энэ засгийн газар төсвөөс гадуур ийм олон тэрбум төгрөгийг зарцуулах эрх  авах шаардлагагүй. Үүнийг УИХ-ын төсвөөр хэлэлцээд батлаад явах ёстой.

Тухайлбал 2007-2012 онд үүргийн сангийн мөнгөөр 18 аймгийн 65 суурин газарт үүрэн телефоны үйлчилгээг 17 аймгийн 66 суманд интернэтийн үйлчилгээг, 13 аймгийн 29 суманд харилцаа холбооны сайт цамхгууд, 17 аймагт шуудангийн хүртээмжийг нэмэгдүүлэх үйлчилгээнд, 21 аймгийн сум сууринд радио телевизийн үйлчилгээний чанар хамрах хүрээг сайжруулахад шаардагдах тоног төхөөрөмжийг нийлүүлэх төсөл хөтөлбөрийг амжилттай хэрэгжүүлсэн байна.

Тиймээс тодорхой амжилтад хүрээд, тодорхой төсөвт суугаад, тодорхой асуудлуудыг шийдэж болж байсан зардлыг төсвийн гадуур эргэлдүүлэх хуулийн төслийг засгийн газар оруулж ирж байгаа нь маш буруу. Тиймээс Ч.Улаан сайдыг энэ асуултад хариулж өгөхийг хүсч байна.

Мөн хуульд тохиролцоод ажлын хэсгүүд буруу ажил хийдэг юм шиг байна гэж Г.Уянга гишүүн ярьсан. Тийм зүйл байхгүй МУ-ын их хурал ширээний хоёр талд суугаад хэрэлдээд эсвэл талцаад суудаг юм биш. Монголын ард түмний төлөө хэрэгцээтэй шаардлагатай байгаа зүйлд зөвшилцлийн хэлбэрээр үйл ажиллагаагаа явуулах хуультай. УИХ-ын гишүүн тойрогтоо юм татаж, мөнгө тавьж байна гэж ярьж болохгүй.

УИХ-ын гишүүний үндсэн үүрэг аймаг орон нутагт хаана хөрөнгө мөнгө дутагдалтай, сургууль эмнэлэг цэцэрлэг байхгүй байна гэдгийг тойргоос сонгогдсон их хурлын гишүүн тэр ажлыг хийх үүрэгтэй байдаг юм. Монголын ард түмний төлөөлөл болж сонгогдсон юм бол төлөөлсөн иргэдийнхээ төлөө үйлчлэх хэрэгтэй. Тиймээс ийм зүйлийг парламентын зааланд битгий ярьж улс төржүүлээрэй. Гишүүд рүү хандаж ийм хаягтай үг мэссеж унагаахаа болих хэрэгтэй.

Харин өнөөдөр 264 объектыг засгийн газар, их хурлын гишүүдийн зөвшөөрөлгүй улсын төсвийн 70 Хувийг таслаад орж ирснээ засаж залруулаад парламент оруулж ирж байгаад баярлаж байна. Гурван эвсэл гурвуулаа оролцоод сайн шийдэлд, үр дүнд хүрсэн гэж бодож байна. хэмээн хэлээ.

Д.Оюунхорол гишүүний асуултад Сангийн сайд Ч.Улаан хариулсан юм.

“ Энэ асуудлыг хэлэлцэх эсэхийг шийдэхээр оруулж ирсэн. Хэлэлцүүлгийн явцад яаж шийдэгдэх нь их хурлын гишүүдийн саналаар болох байх. Тусгай зориулалтын сангуудыг засгийн газарт ажлын хэсэг гарч ажиллаад цөөрүүлэх зарчим барьсан. Хуулийн төсөл хэлэлцэж бэлэн болсон. Засгийн газраар эцэслэн хэлэлцээд их хуралд өргөн барина.

Энэ бодлогын хүрээнд засгийн газрын бий болгосон 40-өөд санг цөөлөх, тусгай сан болгох, заримыг нь тусгай данс хэлбэрт шилжүүлэх, заримыг нь биет хэлбэрт даалгаж төсвөөс гаргах. Одоогоор нэг сангийн асуудал нь түрүүлж орж ирсэн байна. Хэлэлцүүлгийн явцад том тусгай зориулалтын сангийн иж бүрэн хуулийн заалттай уялдуулж хэлэлцээд шийдэх боломжтой" хэмээн хариуллаа.