“Нийслэлийн 374 жилийн ой”-н өдрийг тохиолдуулан Нийслэлийн Удирлагууд ЕБС-ийн ахлах ангийн сурагчдад “Улаанбаатар хотын түүх ба хотын соёл” сэдвээр Нийслэлийн Удирдлагууд хичээл заалаа. Нийслэлийн ИТХ-ын дарга Д.Баттулга Сүхбаатар дүүргийн Ерөнхий боловсролын 1-р дунд сургуулийн ахлах ангийн сурагчдад хичээл заасан бөгөөд Нийслэлийн 1639 оноос хойшхи түүх, хөгжлийн талаар мэдээлэл өгсөн юм.

Хичээлийнхээ төгсгөлд сурагчдаас хотын талаарх хүн бүрийн мэддэг хэрнээ тэр бүр анзаардаггүй асуултыг асууж, мэдлэгийг нь шалгасан. Монгол улсын Нийслэл, Улаанбаатар хот хоёрын ялгаа, Улаанбаатар хот хэдэн дүүрэгтэй талаар асуусан юм. Тэрээр сурагчдад “Хүн бүхэн өөрсдийн мэддэг зүйлээ хайрладаг. Тиймээс хотын гудамжинд хог хаяхгүй байх, зам хөндлөн гарахдаа гарцтай газраар гарах, ахмад настан болон бусдыг хүндэтгэж явах”-ыг захилаа.

Чингэлтэй дүүргийн 23-р сургууль

Харин нийслэлийн Засаг дарга бөгөөд Улаанбаатар хотын Захирагч Э.Бат-Үүл Чингэлтэй дүүргийн 23-р сургуулийн ахлах ангид хичээл заалаа. Хотын дарга хичээлээрээ Улаанбаатар хотын ирээдүйг хэрхэн төлөвлөн ажиллаж байгаа талаар сурагчдад мэдээлэл өгсөн юм. “Та бүхнийг өсөж том болоод сайхан залуус болох үед бид Улаанбаатар хотоо тохилог, өнгөлөг, дүрэмтэй болгон хөгжүүлж, “Дэлхийн хот”-ыг хүлээлгэн өгөх болно.

Ингэхийн тулд хичээнгүйлэн сэтгэл гарган зүтгэж байгаа. 2030 онд өвлийн олимп зохион байгуулахаар төлөвлөсөн гэдгийг та бүхэнд дуулгахад таатай байна. Гэхдээ зохион байгуулах эрх авахын тулд манай хот хүн бүр ирэхийг, зочлохыг хүсдэг жуулчдад таатай, ээлтэй хот болох учиртай. Тиймээс хотоо өнгөлөг тохилог, сайхан байлгахад хүүхдүүд та бүхний ч хичээл зүтгэл хэрэгтэй юм шүү” гэж нийслэлийн Засаг дарга онцлон захилаа.

Мөн “Физик, математикийн багшаар ажиллаж байсан үе маань санаанд орж, хотынхоо тухай хүүхдүүдтэй санал бодлоо хуваалцсандаа их таатай байна” гэж сэтгэгдлээ илэрхийлсэн юм. Хичээлийн дараа сурагчид “Гоё хоттой болохын тулд бид ч гэсэн хичээх болно. Хотын даргадаа баярлалаа” гээд амжилт хүслээ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.