Эрүүл мэндийн сайд Н.Удвал
2013.10.31

Н.Удвал: Эмч нараа улстөрчдийн тоглоом болохгүй гэдэгт итгэж байна

Эрүүл мэндийн сайд Н.Удвалтай Эрүүл мэндийн салбарт “Эмчилгээ” хэрэгтэй юу... сэдвийн хүрээнд ярилцлаа.

-ГССҮТ-ийн даргаар томилогдсон Ц.Энхбаяр эмчийг таны хүн учраас зүтгүүлээд байна гэсэн хардлага олон нийтийн дунд бий. Салбарын сайдын хувьд энэ тал дээр ямар тайлбар хийх вэ?

-Миний хувьд Ц.Энхбаяр даргатай ямар ч хамаагүй. Сонгон шалгаруулалтын үеэр мэргэжилдээ сайн ийм эмч байдгийг мэддэг болсон. Шинэчлэлийг хийж чадах хүсэл зоригтой хүнийг томилох нь миний ёс суртахууны үүрэг, хуулийн өмнө хүлээсэн хариуцлага. Тиймд энэ яриа ор үндэсгүй гэдгийг баталж байна.

-Нэг эмнэлэгт 160 хүн ажлаас халагдах өргөдлөө өгөх нь том асуудал. Ц.Энхбаяр даргаас өөр энэ эмнэлгийг удирдах чадварлаг боловсон хүчин байхгүй юу?

-Энэ бол Ц.Энхбаяр даргатай холбоотой асуудал биш. Шинэ хуучны зөрчил. Хуучин байр сууриа хадгалж үлдэх гэсэн цөөн хэдэн хүмүүс хамт олноо турхиран, тэдэнд нөлөөлж, хүчирхийлэл, шахалт дарамт үзүүлэн хийж буй зүйл. Шинэчлэлд ийм зүйл тохиолдох нь жам ёсны үзэгдэл.

Нөгөө талаас шинэчлэл хийж, иргэдийн хүсэн хүлээлтийг хангах гэсэн шинэчлэлийн бодлого хоорондын зөрчил. Мөн гэмтлийн эмнэлгийн санхүү мөнгөний урсгал дээр өөрийн эзэмшил, хараа хяналтаа тогтоосон улс төр бизнесийн бүлэглэлээс явуулж буй зохион байгуулалттай турхиралт гэж үзэж болно.

-Та ард нь байгаа хүмүүсийг нэрлэж чадах уу?

-Тийм хүмүүс бол байна.

-Ажлаас халагдах өргөдлөө дуртай үедээ өгдөг бол эмч байгаад тангараг өргөх хэрэгтэй юм уу?

-Өргөдөл өгөх нэг хэрэг, ажлаа орхиод явах нь бас өөр хэрэг. Эмч нарыг өргөдлөө өгөөд гарна гэж бодохгүй байна. Эмч нараа улстөрчдийн тоглоом болгож, энэ олон жил хуримтлуулсан капитал, нэр төр, мэргэжлээрээ тоглуулж гарахгүй гэдэгт итгэлтэй байгаа. Тиймд гэмтлийн эмнэлгийн үйл ажиллагаа хэвийн явагдана гэдэгт эргэлзэхгүй байна.

ГССҮТ-ийн асуудал бол улс төр бизнесийн бүлэглэлээс явуулж буй зохион байгуулалттай турхиралт
-Та сайдаар томилогдоод 1,3 жил боллоо. Өнгөрсөн хугацаанд энэ салбарт хийсэн хамгийн том өөрчлөлтөөр юуг нэрлэх вэ?

-Хамгийн том өөрчлөлт бол эрүүл мэндийн бодлогыг сайд өөрийн хүсч буй, өөрт хэрэгтэй бодлогыг гаргадаг биш, баталгаа нотолгоонд суурилсан шинжлэх ухааны үндэстэй бодлого гаргах шинэ эргэлт хийж чадсан хамт олноороо бахархаж байна.

-Ойрын хугацаанд таны хийх ажил юу байна вэ?

-Шинэчлэлийн бодлого бэлэн болсон ч хэрэгжиж чадахгүй байна. Шинэчлэлийн бодлогоо байгууллага, хөрсөн дээр нь хэрэгжүүлж, иргэдийн гарт баригдаж, нүдэнд үзэгдэх шинэчлэлийг хийх ажилд ирж буй цаг хугацааг зарцуулна.