Ч.Улаан: Аль ч салбарын төсөвт өмнөх оныхоос бууруулсан төсөв орж ирээгүй
Хууль зүйн байнгын хороо / 2013.11.06 /
2013.11.07

Ч.Улаан: Аль ч салбарын төсөвт өмнөх оныхоос бууруулсан төсөв орж ирээгүй

 Хууль зүйн байнгын хороо / 2013.11.06 / үдээс хойш хуралдаж Монгол Улсын 2014 оны төсвийн тухай, Нийгмийн даатгалын сангийн 2014 оны төсвийн тухай, Хүний хөгжил сангийн 2014 оны төсвийн тухай хуулийн төслүүдийн хоёр дахь хэлэлцүүлгийг хэлэлцлээ.

   Байнгын хорооны хуралдаанд  Хууль зүйн сайд Х.Тэмүүжин, Сангийн сайд Ч.Улаан, Хууль зүйн яамны Төрийн нарийн бичгийн дарга Ж.Баярцэцэг, Шүүхийн ерөнхий зөвлөлийн дарга Н.Лүндэндорж, Хүний эрхийн үндэсний комиссын дарга Ж.Бямбадорж болон бусад албаны хүмүүс оролцлоо.

 Хууль зүйн байнгын хороо / 2013.11.06 /

 Байнгын хорооны хуралдаан асуулт, хариултаар эхэлсэн юм. УИХ-ын гишүүн Д.Лүндээжанцан Хууль зүйн байнгын хороонд харъяалагддаг хууль сахиулагч байгууллагын 2014 оны төсөвт заасан хөрөнгө хуулийн үйлчилгээ үзүүлэхэд хангалттай эсэхийг тодрууллаа. Үүнд Монгол Улсын шүүхийн ерөнхий зөвлөлийн дарга Н.Лүндэндорж  ирэх оны төсөв өмнөх жилүүдийнхээс нэмэгдсэн үзүүлэлттэй байгаа бөгөөд урсгал зардал 136 тэрбум, хөрөнгө оруулалтын зардал 102 тэрбум, нийт 238 тэрбум төгрөг байхаар төсвийн төсөлд суусан гэдгийг хэллээ. Харин Хүний эрхийн үндэсний комиссын дарга Ж.Бямбадорж, 2014 онд төсөв хасагдаж байгаа тухай дуулгаад, хөдөө орон нутагт ажилладаг Хүний эрхийн үндэсний комиссын төлөөлөгч нарын хөрөнгө оруулалтыг хасахгүй байхыг хүслээ.

  Үндсэн хуулийн цэц, Авлигатай тэмцэх газар, Цагаатгах ажлыг удирдан зохион байгуулах улсын комисс, Улсын ерөнхий Прокурор, Монгол Улсын Дээд шүүхийн удирдлагууд болон Хууль зүйн сайд төсөвтэй холбоотой ямар нэгэн санал, асуулт байхгүй тухайгаа хэлэв.

  УИХ-ын гишүүн Б.Бат-Эрдэнэ Шүүхийн ерөнхий зөвлөлийн даргад хандан 2014 оны шүүхийн төсвийн урсгал зардлыг 60 хувь, цалин хөлс болон нэмэгдэл урамшуулал 7 хувиар буурсан талаар тодруулж асуухад, Н.Лүндэндорж дарга, энэхүү үзүүлэлт нь Сангийн яам болон Шүүхийн ерөнхий зөвлөл тус тусдаа төсөв гаргаж байгаатай холбоотой бөгөөд дээрх үзүүлэлт нь Сангийн яамнаас гаргасан тоо юм. Хэрвээ энэ үзүүлэлтээр явбал Монгол Улсын шүүх дампуурна гэдгийг хэллээ. 2014 оны төсвийн төслөөр  Шүүхийн ерөнхий зөвлөлд 46,4 тэрбум төсөвлөсөн нь шүүгчдийн цалинг одоо авч байгаагаас  нь 1 100 000 төгрөгөөр бууруулах болоод байгаа юм байна.

 Хууль зүйн байнгын хороо / 2013.11.06 /

   Харин Сангийн сайд Ч.Улаан дээрх асуудалтай холбоотой хариу хэлэхдээ, аль ч салбарын төсөвт өмнөх оныхоос бууруулсан төсөв орж ирээгүй, Шүүхийн ерөнхий зөвлөлийн 2013 оны төсөв 38,8 тэрбумаар батлагдаж, 2014 онд 46,4 тэрбум болсоныг мэдэгдлээ.

   Шүүгчийн цалингийн хэмжээний талаар Д.Ганбат гишүүний асуултанд Н.Лүндэндорж дарга хариулахдаа, одоогийн байдлаар шүүгч нар 2 сая төгрөгийн цалинтай бөгөөд Сангийн яамны төсвийн төсөлд тусгаснаар ирэх онд нэг дахин бага буюу ойролцоогоор 750-850 мянган төгрөгийн  цалин авах болж байгаа  тухай хэлээд, Шүүхийн ерөнхий зөвлөлөөс өргөн барьсан төсөвт шүүгч нь санхүүгийн хувьд хараат бус байх үндэслэлийг харгалзан  цалингийн дээд хэмжээ 4 сая байхаар тусгасан тухай хэлэв.

   Ингээд  гишүүдийн гаргасан зарчмын зөрүүтэй саналаар санал хураалт явуулахад тус байнгын хорооны гишүүдийн олонх дэмжлээ. Дэмжигдсэн саналыг нэгтэн Төсвийн байнгын хороонд шилжүүлснээр өнөөдрийн хуралдаан өндөрлөсөн юм