МАХН-ын Ерөнхий нарийн бичгийн дарга Г.Шийлэгдамбатай Бага чуулганы талаар болон зарим асуудлаар ярилцлаа.

-МАХН Бага чуулганы удахгүй хуралдуулж, Их чуулганыг товлон зарлана гэл үү?

-Манай намын Бага чуулган энэ сарын 24-ний өдөр хуралдана. Он гаргаад Их чуулганаа хуралдуулахаар төлөвлөж байна. Эдгээр чуулганыг хуралдуулахын өмнө дүүргүүдийн намын хорооны хурлыг өнгөрсөн амралтын өдөр зохион байгууллаа.

Хуралдааны явцад зарим нэгэн гишүүн Бага чуулгантай холбогдуулан байр сууриа илэрхийлсэн байна билээ. Намын гишүүдийн байр суурь сөрөг байх асуудал байдаг. Гэхдээ эдгээр хурал батлагдсан журмынхаа хүрээнд хүчин төгөлдөр хэрэгжиж, зохих ёсны шийдвэр гаргасан байгаа.

Тухайлбал, Сонгинохайрхан, Баянгол дүүргийн гишүүд тухайн намын байгууллагаа олонхийн шийдвэрээр шинээр байгуулсан. Тэгэхээр шинээр сонгогдсон дүүргийн дарга нартай гэрээ байгуулах, чуулганыг зохион байгуулах бэлтгэл ажлыг намынхаа дүрмийн хүрээнд хийнэ.

-"Шадар сайд Д.Тэрбишдагва, Н.Удвал сайдыг огцруулъя. Өөрсдийг нь дэмждэг хүмүүстэй хамтран ажиллаж байна" гэсэн шүүмжлэл танай намд гарсан гэсэн. Үүн дээр та баттай хариулт өгөхгүй юү?

-Энэ бол тухай хүмүүсийн байр суурь. МАХН нэр бүхий сайд нартай холбоотой гарсан гомдол, огцруулах тухай хөндөж тавьсан ямарваа нэг албан ёсны өргөдлийг хүлээж аваагүй. Харин хэвлэл мэдээллийн хэрэгслээр гарч байгаа байр суурь хувь гишүүдийн өөрсдийнх нь санал, бодол байна гэж хүлээж авсан.

Ер нь бол УИХ, Засгийн газрын гишүүдтэй холбоотой ажлын хариуцлага, намын өмнө хүлээх үүргийг тодорхой болгон гэрээ байгуулсан. Энэ гэрээнийхээ хэрэгжилтийн явцын талаар өөр, өөрсдөө байр сууриа илэрхийлж, намын Бага, Их чуулганы хуралдаанаар зохих үнэлэлт дүгнэлт өгөх ёстой.

Үнэхээр бид УИХ, Засгийн газар болон төрийн өндөр албан тушаалд МАХН-аас томилогдсон хүмүүстэй хариуцлага тооцдог байх механизмаа бусад улс төрийн намуудаас түрүүлж хэрэгжүүлж, ажиллаж байгаа. Шаардлагатай гэж үзвэл тухайн нэр бүхий хүмүүсийн хувьд дүгнэлт гаргаж, асуудлыг судалж үзэх бололцоотой.

-МАХН-ын дарга Н.Энхбаяр Солонгосоос удахгүй ирнэ гэсэн мэдээлэл бий. Энэ үнэн үү?

-МАХН-ын гишүүд төдийгүй Монголын ард иргэд Н.Энхбаяр даргыг хэзээ ирэх бол, эрүүл мэндийн байдал нь ямар байна гэх зэргээр өдөр тутамд бидэн рүү хандаж,  тодорхой мэдээлэл авч байгаа. Н.Энхбаяр дарга яг тэдэнд ирнэ гэдгийг барин тавин мэдээлэх боломжгүй байна. Энэ бол хувь хүний эрүүл мэндийн байдлаас шалтгаалж бий болох хариулт юм.

Тэгэхээр эрүүл мэндийн байдал нь харьцангуй сайжирсны дараа эргэж ирэх байх. Н.Энхбаяр даргын хувьд зарим нэг мэс ажилбарт орсон. Харин нарийн шинжилгээ хийлгээд дахин хагалгаанд орж магадгүй гэсэн урьдчилсан мэдээ бидэнд байна. Гэхдээ ямар хагалгаанд, хэзээ орох нь тодорхойгүй байна.

-МАХН -ынхан Их чуулганаар ямар асуудал хэлэлцэх нь анхаарал татаж байна. Хэлэлцэх асуудлаа тодорхой болгосон уу?

-Бага чуулганаараа Их чуулганаар хэлэлцэх асуудлыг шийдвэрлэнэ. Мөн Их чуулганы товыг албан ёсоор зарлана. 2013 онд МАХН-аас төвлөж явуулсан арга хэмжээнийхээ хэрэгжилтийн асуудлыг хэлэлцэнэ. Нөгөө нэг гол асуудал бол Ерөнхийлөгчийн сонгууль.

МАН төдийгүй улс төрийн үйл ажиллагаа идэвхтэй явуулж байгаа бүх намтай МАХН зөв зүйл дээрээ хамтарч ажиллах зарчим барьдаг.

Энэ сонгуулийн үйл ажиллагааны алдаа оноо, амжилт, үр дүнг авч хэлэлцэж таарна. Өмнөх Бага чуулганаар өгсөн үүрэг, даалгаврын хэрэгжилтийг ярилцана.  Ерөнхий нарийн бичгийн даргын хувьд дээрх асуудлын хүрээнд үндсэн илтгэл тавьж хэлэлцүүлж, намынхаа гишүүдийн санал, шүүмжийг сонсох байдлаар Бага чуулганаа хуралдуулна.

Их чуулганаар маш олон асуудлыг авч үзнэ. Гол нь асуудал бол Монгол Улсын нийгэм, эдийн засгийн байдалд үнэлэлт дүгнэлт өгч, МАХН УИХ-д дэвшүүлэн тавьсан мөрийн хөтөлбөрийн хэрэгжилтийг дүгнэхээр төлөвлөсөн байгаа.

-Зохион байгуулалтын асуудлыг хөндөх үү?

-МАХН-ын Их чуулганаар зохион байгуулалтын асуудлыг хэлэлцдэг. Энэ утгаараа намын зохих удирдлагууд өөрсдийнхөө хийсэн ажлын талаар тайлан илтгэлээ тавина. Мэдээж зохион байгуулалтын асуудлыг ярьж таарна.

-МАН-ын XXVII Их хурал дээр МАХН-аас илгээлт хүргүүлсэн. Үүгээрээ хоёр нам нэгдсэн бодлого, байр суурьтай байна гэж ойлгож болох уу?

-МАХН МАН-ын Их хуралд албан ёсны илгээлт хүргүүлсэн. Миний бие Ерөнхий нарийн бичгийн даргын хувьд уг илгээлтийг МАН-ын Их хурлын төлөөлөгчид уншиж сонордуулсан юм. Мэдээж хоёр намын цаашдын хамтын ажиллагаанд ач холбогдол өгөлгүй яах вэ. Ач холбогдол өгнө гэдэг нь нийлээд нэг нам болох тухай асуудал биш.

МАН төдийгүй улс төрийн үйл ажиллагаа идэвхтэй явуулж байгаа бүх намтай МАХН зөв зүйл дээрээ хамтарч ажиллах зарчим барьдаг. Энэ байдлаа илэрхийлсэн. МАН-тай нэгдэж нийлэхээс илүүтэй хамтарч ажиллах талаар ач холбогдол өгч байгааг дахин хэлмээр байна.