Хууль зүйн байнгын хороо өчигдрийн хуралдаанаараа Иргэний хэрэг шүүхэд хянан шийдвэрлэх тухай хуульд нэмэлт, өөрчлөлт оруулах тухай, Эрүүгийн байцаан шийтгэх хуульд нэмэлт, өөрчлөлт оруулах тухай, Монгол Улсын шүүхийн тухай хуульд өөрчлөлт оруулах тухай, Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслүүдийн эцсийн хэлэлцүүлгийг хийлээ.

Асуудлыг хэлэлцэхэд гишүүдийн зүгээс ямар нэгэн санал бас асуулт гараагүй учраас санал хураалт явуулж УИХ-д оруулан хэлэлцүүлэхээр болсон юм. Хуулийг хэлэлцэх явцад УИХ-ын гишүүн Д.Лүндээжанцан хуулийг баталсан өдрөөс нь мөрдөх горимын санал гаргахад гишүүд дэмжсэн юм.

Харин тэдний хэлэлцсэн дараагийн асуудал нь Шүүхийн захиргааны тухай нэмэлт, өөрчлөлт оруулах тухай, Шүүгчийн эрх зүйн тухай хуульд нэмэлт өөрчлөлт оруулах тухай болон дагалдах хуулиудад өөрчлөлт оруулах асуудлыг хэлэлцсэн. Эл асуудалд мөн л санал нэмэрлэх гишүүн гарсангүй. Тиймээс Р.Бурмаа гишүүн УИХ-д танилцуулж эцсийн хэлэлцүүлгийг хийлгэхээр болсон.