Эрүүл мэндийн яамнаас төрийн сангийн санхүүжилтээр гадаадын өндөр хөгжилтэй оронд ЭМЯ-ны харьяа төв эмнэлэг, төрөлжсөн мэргэжлийн төв, БОЭТ, аймаг дүүргийн нэгдсэн эмнэлгийн эмч нарыг анх удаа урт, богино хугацааны мэргэжил дээшлүүлэх сургалтад хамруулж эхэлсэн.

Япон, БНХАУ, БНСУ, Турк, ОХУ зэрэг улсад урт болон богино хугацаагаар 114 эмч, сувилагчийг сургахаар төлөвлөсөн байна.

Эрүүл мэндийн сайд Н.Удвал, ЭМЯ-ны Төрийн захиргааны удирдлагын газрын дарга Д.Оюунчимэг, Эрүүл мэндийн хөгжлийн төвийн захирал Ч.Бат-Эрдэнэ нар гадаадад суралцах эмч, сувилагчдын дөрөв дэх багийнхантай уулзлаа.

Бид энэ жил эмч, мэргэжилтнүүдийнхээ мэргэжлийг дээшлүүлэх асуудалд голлон анхаарч ажиллаж байна.

Нийт 19 хүний бүрэлдэхүүнтэй энэ багийнхан ОХУ-ын Эрхүү хотын Анагаах ухааны их сургуульд мэргэжил дээшлүүлэхээр явж байгаа юм. Мэс засал, хүүхэд, дотор, эх барих, эмэгтэйчүүд, мэдээгүйжүүлэг эрчимт эмчилгээний чиглэлийн 16 эмч, гурван сувилагч нэг сарын хугацаатайгаар ийнхүү эх орноосоо мордож байна.

Эрүүл мэндийн сайд Н.Удвал хэлэхдээ, “Бид энэ жил эмч, мэргэжилтнүүдийнхээ мэргэжлийг дээшлүүлэх асуудалд голлон анхаарч ажиллаж байна. Ялангуяа аймаг, дүүргийн нэгдсэн эмнэлгийн эмч нарыг илүүтэйгээр сургахаар төлөвлөсөн. Мөн манай оронд дутагдалтай байдаг нарийн мэргэжлүүд тухайлбал, Андрологи, Иммуногематологи, тархи, нуруу нугасны мэс заслын чиглэлээр эмч нарын мэргэжлийг дээшлүүлэхээр суралцуулж байгаа.

Манай улс эх, нярайн эндэгдэл өндөр орноос дунд түвшинтэй орны тоонд орсон. Энэ бол эрүүл мэндийн салбарын амжилт. Цаашид улам бууруулахад та бүгдийн гадны өндөр хөгжилтэй орноос сурч ирсэн шинэ технологи, аргачлал чухал үүрэг гүйцэтгэнэ гэдгийг хэлэхийг хүсч байна” хэмээгээд яаралтай түргэн тусламжийн чиглэлээр БНСУ-д ч эмч нарыг сургаж эхэлснийг дуулгасан.

Гадаадын улс орнуудад суралцах эмч, сувилагч нарт мэргэжил дээшлүүлэх хугацаандаа ямар зүйлийг голлон анхаарах талаар нэгдсэн удирдамжийг өгч байгаа юм байна. Тодруулбал, Эмч нар тухайн мэргэжлийнхээ эмнэлгийн тусламж үйлчилгээний зохион байгуулалт, стандарт, технологи, сургалт, шинэ дэвшилтэт арга барилаас суралцаж, мэдлэг ур чадвараа дээшлүүлэхийг зэрэгцээ эх орондоо нэвтрүүлэхийг үүрэг болгож байгаа ажээ.

ОХУ-ын Эрхүү хотод суралцах эмч, сувилагчидтай уулзлаа