Эрүүл мэндийн яамны Ерөнхий мэргэжилтнүүдийн зөвлөгөөн өнөөдөр боллоо. Энэхүү зөвлөгөөнд Эрүүл мэндийн сайд Н.Удвал оролцож, Эрүүл мэндийн тусламж, үйлчилгээний чанар аюулгүй байдлыг сайжруулах тушаалын төслийн талаар санал солилцов. 

Эрүүл мэндийн тусламж, үйлчилгээний чанарыг сайжруулах үүднээс эмнэлгийн тусламж, үйлчилгээний стандартыг ахиулах, тусламж, үйлчилгээний хүлээгдэл чирэгдлийг бууруулах, эмнэлгийн ажилчдын ёс зүй, харилцаа хандлага, алдаа эндэгдлийг бууруулах, эмнэлгийн дотоод халдвараас урьдчилан сэргийлэх, оношилгоо, эмчилгээ, мэргэжлийн ажилбарын үе дэх эрсдлийг бууруулах, хэрхэн бүртгэх, мэдээлэх зэрэг таван зорилтыг дэвшүүлэн, ажил хэрэг болгож эхэлснийг салбарын сайд онцолсон. 

 Мөн уг зөвлөгөөний үеэр эмчилгээ, оношилгооны үйлдлийн эрсдлийн жагсаалт, бүртгэл, урьдчилан сэргийлэлт, гарсан үед авах арга хэмжээний талаар Ерөнхий мэргэжилтнүүдийн саналыг сонссон юм. Аливаа эрсдлийг олон талаас нь харж, үнэлж сурах хэрэгтэй. Эхний ээлжинд яаралтай, амь насанд аюул учруулах, тэргүүлэх чиглэлээ тодорхойлж, тухайн байгууллагууд өөрсдөө эрсдлээ тооцох нь илүү үр дүнтэй болно гэдэг дээр Ерөнхий мэргэжилтнүүд санал нэгдэж байв. 

Өвчин бүр тодорхой хэмжээгээр эрсдэл дагуулдаг.

Өвчин бүр тодорхой хэмжээгээр эрсдэл дагуулдаг. Тиймээс эрсдлийг ангилалд оруулах, тухайлбал, өвчтний насны онцлог, өвчний байдал, мэс ажилбарын онцлог, хүүхэд, эх барих, эмэгтэйчүүд, дотрын гэх мэтээр ангилах нь зүйтэй. Эрсдэл гэдэг зөвхөн эмч, эмнэлгийн байгууллагаас шалтгаалахгүй тухайн өвчтнөөс ч шалтгаалан үүсдэг гэдгийг ч зарим мэргэжилтнүүд хэлсэн юм.

Түүнчлэн ЭМЯ-наас ажлын хэсэг гаргаж, эмнэлгийн байгууллагуудыг ерөнхий удирдамжаар хангасны дараагаар байгууллага бүр өөрсдөө эрсдлээ тооцож, тухайн эрсдлийн давтамж, тоо, нэр төрлийг гаргаж, урьдчилан сэргийлэх арга хэмжээ авах хэрэгтэй гэх санааг ч гаргах хүн байлаа. 

 Ингээд Ерөнхий мэргэжилтнүүдийн гаргасан санал бүрийг нэгтгэн, судалсны дараагаар дахин зөвлөлдөхөөр болсноор хуралдаан өндөрлөлөө.