Манай улсын үе, үеийн эрдэмтэн шинжлэх ухааны ажилтан, албан хаагчид, шинжлэх ухаанд оюун бодол, авьяас билэг, хүч хөдөлмөрөө зориулж байгаа бүх хүмүүст Монгол Улсын шинжлэх ухааны ажилтны баярын өдрийг тохиолдуулан Монгол Улсын Засгийн газар, Боловсрол, шинжлэх ухааны яамны нэрийн өмнөөс болон хувиасаа чин сэтгэлийн халуун баяр хүргэе.

Өөрөө хөдсөн дээл өмсөж, эрдэм оюуны далай их сурвалж болсон ном, судраа торгоор баринтаглаж, эрдэм ухааныг шүншиглэн дээдэлдэг үндэстэн бол-Монголууд бид билээ. Эрт дээр үеэсээ эрдэм ухааныг баян баяны дээд, эрхэм баянд тооцож, эрдэм, оюун ухааныг эрхэмлэн шүтэж ирсэн эрдэмт оюунт үндэстэн бол-Монголчууд бид билээ.

Улиран одсон хорьдугаар зуунд орчин цагийн шинжлэх ухаанч мэдлэг, боловсрол, соёл, үнэт зүйлсийг бий болгосон, шинжлэх ухаан, техник, технологийг хөгжүүлж, үйлдвэр, эдийн засгийг цогцлоон бүтээсэн түүхэн гавьяаг түүчээлэн хэрэгжүүлэгчид нь үеийн үеийн монгол эрдэмтэд билээ.

Монголын шинжлэх ухаан мэдлэгт суурилсан үндэсний эдийн засаг, хөгжлийг бий болгох, шинжлэх ухаан, технологийн дэвшилд суурилсан үндэсний үйлдвэрлэлийг хөгжүүлэх түүхэн их сорилтыг даван туулах амаргүй бөгөөд төвөгтэй байгаа өнөө цаг үед шинэ соргогийг эрэлхийлэн мэдлэг, баялгийг бүтээхийн төлөө хоёргүй сэтгэлээр зүтгэж байгаа эрдэмтэн, судлаачид, шинжлэх ухааны нийт ажилтан албан хаагчид та бүхнээрээ бахархаж байна.

Монгол Улсын Засгийн газар, Боловсрол, шинжлэх ухааны яамнаас шинжлэх ухааныг хөгжүүлэх, эрдэмтэн, судлаачид та бүгдийг сэтгэл, хангалуун ажиллах бүхий л бололцоо, нөхцөлийг бүрдүүлэхийн төлөө чармайн ажиллах болно. Эрдэмтэн, судлаачид, шинжлэх ухааны нийт ажилтан албан хаагчид та бүхэнд ажлын өндөр амжилтыг хүсэн ерөөе.

Боловсрол, шинжлэх ухааны сайд           Лувсаннямын      Гантөмөр