“Ногоон хөгжлийн түншлэл” үндэсний чуулган өчигдөр Төрийн ордонд боллоо. Төр-хувийн хэвшил яаж хамтарвал үр дүнтэй ажиллах, хяналт, хариуцлагын механизм ямар байх зэргийг БОНХЯ-ныхан чиглэл бүрийнхэнтэй хамтран 11 удаа хэлэлцсэн байна. Ийнхүү тэд үндэсний анхдугаар чуулган зохион байгууллаа. УИХ-ын чуулганы өнөөдрийн хуралдаанаар “Ногоон хөгжлийн үзэл баримтлал”, “Ногоон хөгжлийн дунд хугацааны хөтөлбөр"-ийг хэлэлцэх юм. Үүний өмнө төр, хувийн хэвшлийн түншлэлийнхэн арга замаа эцэслэн тодорхойлохоор чуулав.

Уг арга хэмжээнд Ерөнхий сайд Н.Алтанхуяг, БОНХ- ийн сайд С.Оюун, Ерөнхийлөгчийн тамгын газрын дарга П.Цагаан, БОХХАА-ны байнгын хорооны дарга Г.Баярсайхан зэрэг албаны хүмүүс оролцлоо. Мөн байгаль орчны салбарт үйл ажиллагаа явуулдаг төр, хувийн хэвшлийн 500 гаруй байгууллагын 800 төлөөлөгч хүрэлцэн ирсэн байв.

Ерөнхий сайд Н.Алтанхуяг

Чуулганы нээлтийн үеэр Ерөнхий сайд Н.Алтанхуяг “Төр бүх эрх мэдлийг атгаад суугаад байх тусам хүнд сурталждаг. Иймд хувийн хэвшлийнхэн хийж чадах ажил үйлчилгээ бүхнийг мэргэжлийн холбоодод шилжүүлэх замаар бизнест ээлтэй орчин бүрдүүлж, төрийн үйлчилгээг чанаржуулахыг Шинэчлэлийн Засгийн газар тэргүүн зорилтоо болгож байна. Бодлого зохицуулалт эхнээсээ ажил хэрэг болж, хүнд суртал халагдсаар байна. Бидний дараагийн алхам ногоон хөгжлийг дэмжсэн зохицуулалтууд байх болно” гэв.

БОНХЯ-наас олгож буй 20 төрлийн лиценз зөвшөөрлийг авахын тулд иргэн, хуулийн этгээд 6-12 төрлийн бичиг баримт бүрдүүлж, 1-3 сар зарцуулдаг байна. Төрийн захиргааны төв байгууллагад ажлын ачаалал, иргэдэд чирэгдэл үүсгэдэг энэ тогтолцоог халах хамгийн оновчтой арга бол зөвшөөрөл олгох ажлыг мэргэжлийн холбоодод шилжүүлэх ажээ.

Экологид ээлтэй, нөөц хэмнэсэн арга технологиуд нэвтрүүлэх ногоон хөгжлийн бодлого нь байгаль хамгаалах төдий бус эдийн засгийн хөгжлийг тэтгэх хөшүүрэг болох юм. Уламжлалт арга ухаанаа дэлхий нийтийн хандлага, орчин үеийн дэвшилд тулгуурлан хэрэгжүүлэхдээ төр хувийн-хэвшлийнхэнд үүдээ нээж байгааг Төрийн ордноо болсон “Ногоон хөгжлийн түншлэл" үндэсний анхдугаар чуулганы үеэр салбарынхан онцолж байв.

Чуулганы үр дүнд төр хувийн хэвшлийн тунхаг бичиг болон "Ногоон ажлын байр” хамтын ажиллагааны санамж бичигт гарын үсэг зурлаа.