Та Төрийн тусгай албан хаагчдын эмнэлгийн барилгыг Хуульзүйн яамны мэдэлд өгөх шийдвэрийг удаа дараа эсэргүүцсэн. Энэ байр сууриа дэмжүүлэхийн тулд мессежээр санал авахаар шийдэв үү?

Би УИХ-ын гишүүнийхээ хувьд Засгийн газрын 122 дугаар тогтоол буюу Төрийн тусгай албан хаагчдын нэгдсэн эмнэлгийн барилгыг Хууль зүйн яам прокурорын байгууллагад шилжүүлэх тухай тогтоолыг Үндсэн хууль зөрчсөн гэж үзсэн. Улмаар Цэцэд өгч шалгуулсан. Харамсалтай нь Үндсэн хуулийн Цэц Засгийн газар шийдэх бүрэн эрхтэй гэсэн хариуг ирүүлсэн л дээ.

Ингэснээр энэ асуудал нэг талд гарчихсан юм. Гэхдээ би хувьдаа байр сууриасаа ухрахгүй. Тиймээс Үндсэн хуулийн заалт зөрчсөн энэ тогтоолыг хүчингүй болгуулахаар Ерөнхий сайд уруу мессэж бичихийг иргэддээ уриалсан. Ерөнхий сайдаас гадна Ц.Нямдорж гишүүн болон, Эрүүл мэндийн сайд Н. Удвал нарт ч мессеж бичихийг уриалж байгаа.

Яагаад гэвэл энэ барилгыг анх эмнэлгийн зориулалтаар бариулах шийдвэр гаргасан хүн бол Хуульзүйн сайд асан Ц.Нямдорж шүү дээ. Тэгсэн хэрнээ түүнийхээ төлөө олигтой дуугарахгүй таг болчихоод байгаа юм. Мөн Монголд нэг ч гэсэн эмнэлэг хэрэгтэй байна гэдэг талаасаа салбарын сайдын байр суурь, дуу хоолой чухал гэж үзэж түүнд хандаж мессеж бичихийг хүсээд байгаа.

Та энэ гурван албан тушаалтны утасны дугаарыг дэлгэх юм уу?

Би бусад том дарга нар шиг баян биш болохоор “Мобиком”-оор санал авч чадахгүй. Өөрөө гурван ширхэг хямдхан дугаар худалдаж авна. Түүнийгээ 20 мянгын үнэтэй утсанд хийгээд л боллоо.

Өөрөөр хэлбэл, нэг нь Ерөнхий сайдад, нөгөө хоёр нь Ц.Нямдорж гишүүн, Н.Удвал сайд хоёрт мессеж бичих дугаар гэсэн үг. Тус бүрт нь ирсэн мессежийг твиттерээр цацна. Гэхдээ мессеж ирүүлсэн хүний дугаарын сүүлийн 4 оронг нь нууцлана.

Мессежээр ямар хугацаанд санал авах вэ?

Ирэх оны дөрөвдүгээр сар хүртэл авна.

Одоо тавих асуулт бол мессежний сэдэвтэй холбоогүй. Та Р. Амаржаргал гишүүний хүсэлтийг хүлээж авахгүй байгаад ямар дүгнэлт хийж байна вэ?

Би хувьдаа Р.Амаржаргал гишүүнийг УИХ-д байж байгаасай гэж боддог. Яагаад өргөдлөө өгөх болсон шалтгааныг нь асуухаар тоймтой зүйл ярьж өгөхгүй байгаа.

Гэхдээ УИХ-д үнэхээр болж бүтэхгүй зүйл байгаа учраас тэр хүн аргагүйн эрхэнд бүрэн эрхээсээ татгалзахаар өргөдөл гаргасан гэж бодож байгаа.

О.Баасанхүү: Мессеж хөдөлгөөнөө ирэх хавар хүртэл үргэлжлүүлнэ