Агаарын бохирдлыг бууруулах ажлыг төрд даатгаж, төрөөс хүлээх биш хувь хүн, албан байгууллагууд өөрсдөө юу хийж, хэрхэн хувь нэмрээ оруулах талаар өчигдөр ярилцлаа. Тус уулзалтыг Монголын бизнесийн зөвлөлийн Байгаль орчны ажлын хэсгээс санаачлан зохион байгуулжээ.

Энэ үеэр Ерөнхийлөгчийн санаачлагаар 2011 онд байгуулагдсан агаарын бохирдлыг бууруулах үндэсний хорооны мэдээлэл болон ЕСБХБ-аас хэрэгжиж дууссан Цэвэр агаарын төслийн эдийн засгийн татаастай холбоотой хийсэн судалгаатай танилцаж, цаашид шинээр хэрэгжих гэж буй ЖАЙКА-гийн агаарын бохирдлын хяналтын чадавхийг бэхжүүлэх төслийн төлөөлөгчид илтгэл тавьсан аж.

Тухайлбал Агаарын бохирдлыг бууруулах үндэсний хороо агаарын бохирдлыг бууруулахын тулд олон талт арга хэмжээ авч байгаа бөгөөд төсөл хэрэгжүүлсэнээс хойш ямартай ч хүхэрлэг хийн агууламж 22.1 хувиар бууржээ. Түүнчлэн 1525 машинд автомашины хорт утааны шүүлтүүрийг байрлуулж, 290 автобусанд гааз, хийн хосолсон хөдөлгүүрийг суурилуулж байгаа аж.

Их дээд сургуулиудын цагийн хуваарийг өөрчилж, Нарны гүүр барьж, Гудамж төслийг хэрэгжүүлсэн нь агаарын бохирдлыг бууруулахад гол үр дүн болжээ.

Ойрын хугацаан тавин тэрбум төгрөгийг агаарын бохирдлыг бууруулахад зарцуулахаар төсөвлөжээ.

Иймэрхүү үр дүнтэй байгаа болохоор Монголын бизнесийн зөвлөлийн зүгээс өөрийн Байгаль орчны чиглэлийн дөч гаруй гишүүн байгууллагуудын дунд хэлэлцүүлэг зохион байгуулж байгаа юм.