МАН-ын Удирдах зөвлөлийн 21 гишүүн намынхаа 27 дугаар Их хурлын шийдвэр, бодлого үр дүнг сурталчилахаар 21 аймагт ажиллаж байгаа.

Гишүүд хөдөө орон нутаг хариуцсан нарийн бичгийн дарга нартайгаа хамтран бүсчилэн ажиллаж байгаа бөгөөд Баруун бүс хариуцсан нарийн бичгийн дарга Ч.Хүрэлбаатараар ахлуулсан ажлын хэсгийнхэн өнгөрсөн долоо хоногт Завхан, Говь-Алтай, Ховд, Баян-Өлгий аймагт ажилласан юм.

МАН-ын Ерөнхий нарийн бичгийн дарга Ж.Мөнхбат болон УИХ-ын гишүүн Д.Оюунхорол, Ч.Хүрэлбаатар, А.Тлейхан, С.Бямбацогт, Ц.Дашдорж болон МАН-ын намын байгуулалт, стратеги төлөвлөлтийн газрын дарга А.Ариунзаяа нарын бүрэлдэхүүнтэй ажлын хэсэг дээрх аймгуудад ажиллаж байгаа юм. Хуралдааныг МАН-ын Ерөнхий нарийн бичгийн дарга Ж.Мөнхбат эхлүүллээ. Тэрбээр, намынхаа Их хурлын шийдвэр, намын шинэ удирдлага бүтэц бүрэлдэхүүнийг танилцуулав.

Тодруулбал, МАН-ын 27 дугаар их хурал шат шатны сонгуульд ялагдал хүлээсний дараа тус намд шинэчлэлийн уур амьсгал хүчтэй илэрсэн. Тийм ч учраас энэ удаагийн Их хурал УИХ, Орон нутаг, Ерөнхийлөгчийн сонгуульд ялагдсанд дүн шинжилгээ хийсэн, цаашдын зорилго зорилтуудаа тодорхойлсон шинэчлэлийн хурал болж чадлаа гэдгийг намын Ерөнхий нарийн бичгийн дарга хуралдааны эхэнд хэлж байлаа. Мөн намын шинэчлэлийг гурван зүйл дээр тулгуурлан хийсэн гэв.

Нэгдүгээрт бодлогын шинэчлэл, хоёрдугаарт хүний нөөц, бүтэц зохион байгуулалтын шинэчлэл, гуравдугаарт үйл ажиллагааны шинэчлэл хийсэн гэдгийг онцолж байлаа. Түүнчлэн намын Удирдах зөвлөлийн гишүүдийн тоо цөөрснөөс гадна Удирдах зөвлөлдөө ихэвчлэн өндөр боловсрол эзэмшсэн залуусыг оруулж, цомхон чадварлаг баг бүрдүүлж чаджээ.

Өөрөөр хэлбэл, Удирдах зөвлөлийн 73 хувь нь 45-аас доош насны залуус, 25 хувь нь эмэгтэйчүүд, 60 хувь нь гадаадын өндөр хөгжилтэй орнуудад их дээд сургууль боловсрол эзэмшсэн гэдгийн онцлов. Үүнээс гадна сүүлийн үед хамгийн их шүүмжлэлд өртөөд байсан намын дээд удирдлагууд жирийн дэмжигч гишүүдийн үгийг сонсдоггүй гэсэн шүүмжлэлийг засч долоо хоног бүр тэдэнтэй уулзаж байгаа хэмээлээ. МАН түүхэн, шинэчлэлийн хурлаа хийж “гишүүн төв”-тэй намынхаа үүргийг биелүүлж эхэлсэн талаар хэлж байлаа.

Баруун аймгийнхан бүсийн нэмэгдэлд анхаарал хандуулах хэрэгтэйг санууллаа