Мянганы хөгжлийн зорилтуудын тавдугаар илтгэлийг танилцууллаа.

Энэ үеэр эх хүүхдийн эндэгдэл, мэдээлэл технологи, халдварт өвчнөөс урьдчилан сэргийлэхэд тавьсан зорилтдоо хүрэхэд ойрхон байгааг дуулгасан бол эсрэгээрээ агаарын бохирдол, тогтвортой санхүүгийн тогтолцоог хөгжүүлэх, далайд гарцтай болох гэх мэт асуудалд хэрэгжилт хангалтгүй, зорилтоо биелүүлэхэд хүндрэлтэй байна хэмээн мэдэгдсэн байна.

Эдийн засгийн хөгжлийн яамнаас мянганы хөгжлийн зорилтуудын тавдугаар илтгэлийг танилцуулж байна. Монгол улсын хувьд мянганы хөгжлийн зорилтууддаа 2008 онд тодотгол хийж нийт 9 зорилгын хүрээнд 24 зорилт 64 шалгуур үзүүлэлтийг баталсан юм. Харамсалтай нь мянганы хөгжлийн санд нэгдээд 13 жил болж байгаа ч нийгмийн үзүүлэлтүүд  буурахгүй байгаа хандлага ажиглагдсан байна.

Монгол улсын хэмжээнд 2015 он гэхэд ядуурлын түвшинг 18 хувь болгож бууруулах зорилт тавьсан. Өнгөрсөн оны байдлаар хүн амын 27 хувь нь амьжиргааны баталгаажих төвшнөөс доогуур амьдралтай байгаа юм. Иймээс үлдээд байгаа хоёр жилийн хугацаанд ядуурлын түвшинг бууруулах боломж байгааг илэрхийлж байна.

УИХ-ын гишүүн З.Баянсэлэнгэ “Багассан, сайн үр дүнтэй хэдий ч алслагдсан сум дүүрэг, анхан шатанд эмнэлгийн тусламж үйлчилгээ авч чадахгүй байх зүйлүүд гарч байгаа ч монгол улсын хэмжээнд үнэлгээ сайн явдаг. Энэ үнэлгээнд сэтгэл ханах шаардлагагүй” хэмээн хэллээ.

Нийслэлийн хувьд анхаарлын гол түвд байгаа агаарын бохирдлыг бууруулах зорилтыг эдийн засаг хөгжлийн яамнаас танилцуулснаар сүүлийн гурван жилийн хугацаанд агаар дах азотын давхар исэл болон хүхэрлэг хийн агууламж буурах бус харин ч эсрэгээрээ хурдацтай нэмэгдэж байгааг хэлсэн. Хэдийгээр чамгүй төсөл хөтөлбөр боловсруулж хэрэгжүүлсэн ч хэрэгжилт хангалтгүй байгааг мянганы хөгжлийн зорилтыг хангах тавдугаар илтгэлд гэрчилж байна.