Ерөнхий сайд Н.Алтанхуяг 12 дугаар сарын 3,4 нд Архангай аймагт ажилллах үеэрээ шинээр баригдсан Хүүхдийн номын сан, худалдааны битүү зах, хог ангилах цэг, орон сууц болон хаусны шинэ хороололтой танилцаж, бусад аймгуудад нэвтрүүлж болох санал, санаачилгууд цөөнгүй байна гэлээ.

Канад хаус худалдаж авах иргэд 8 хувийн хүүтэй зээлд хамрагдана 

Арханхай аймагт сүүлийн 40 жилд 36 айлын орон сууц ашиглалтад орсон бол энэ 2013 онд 256 айлын орон сууцыг ашиглалтад өгчээ. Нийтийн орон сууцаас гадна тус аймагт Канад хороолол буюу Канадын загвараар 200 орчим айлын хаус барьж байгуулж байна. Төр газар болоод газар доогуурх дэд бүтцийг нь татаж өгснөөр энэ хорооололд амьдрах иргэдийн тав тухыг хангажээ.

Нэг ам метр талбайн үнэ 600 000-1 000 000 төгрөгт байхаар гүйцэтгэгч компанитай гэрээ байгуулсан бөгөөд худалдаж авсан иргэнд газрыг нь өмчлүүлнэ гэж тус аймгийн Засаг дарга Д.Бат-Эрдэнэ хэллээ. Канад хаус, амины орон сууц худалдан авах иргэд орон сууцны 8 хувийн хүүтэй зээлд хамрагдах боломж бүрдээгүй байгаа.

Ийм боломж бүрдүүлж өгөхийг аймгийн удирдлагууд Ерөнхий сайдаас хүсч байлаа. “Хаус худалдаж авч байгаа иргэдийг зээлийн хөтөлбөрт хамруулах нь зүйтэй. Энэ асуудлыг судалж шийдвэр гаргана” гэж Ерөнхий сайд Н.Алтанхуяг хэллээ.  

Архангайчууд хогоо ангилдаг шинэ менежментийг нэвтрүүлжээ  

Канад хаус, амины орон сууц худалдан авах иргэд орон сууцны 8 хувийн хүүтэй зээлд хамрагдах боломж бүрдээгүй байгаа.

Хогоо ангилж, дараа нь ялгаж боловсруулдаг менежментийг Архангайчууд нэвтрүүлжээ. Хоёр жилийн өмнө хогондоо дарагдад байсан тус аймаг 50 гаруй га талбайтай хогийн цэгээ нүүлгэхээр  төлөвлөж байсан ч ландфилийн аргаар булшлан цэвэрлэснээр хогийн цэгийн нийт талбай 5 га болжээ. Одоо энд хог ялган ангилах, боловсруулах бага оврын цех ажиллаж байна. Ирсэн хогийг тэнд байрлуулсан чингэлэгүүдэд төрөлжүүлж хийдэг.

Хог хаягдлын 50 орчим хувь нь мөнгө болох, 30 орчим нь шатах хог. Мөнгө болох хогийг чингэлэгт ялгаж авна. Харин шатах хогийг хогийн цэгт гүнзгий ухсан нүхэнд мөн зууханд хийж шатаадаг гэж тус аймгийн Иргэдийн төлөөлөгчдийн хурлын дарга Ч.Мөнхбат танилцууллаа.

Хэдийгээр ийм менежмент нэвтрүүлж хогны асуудлаа шийдсэн ч хог тээвэрлэлтийн ганц машин нь хуучирч шаардлага хангахгүй байгааг ажилчид хэлж байлаа. Архангай аймгийн энэ жишгийг бусад аймагт туршлага болгох нь зүйтэй гэж Ерөнхий сайд аймгийн удирдлагууд болоод хог ангилж ялгаж байгаа хүмүүстэй уулзах үеэрээ хэллээ. 

Архангайн хүүхдүүд номын ордонтой болжээ  

Тус аймаг Хүүхдийн номын ордон байгуулж, өнгөрсөн есдүгээр сард ашиглалтад оруулжээ. Улсын төвийн хөрөнгө оруулалтаар боссон энэ ордон нь Их мэдэх танхим, Нийтийн уншлагын танхим, нүүдлийн номын сан, гэр бүлийн танхим, хүүхдийн уншлагын танхим, хөгжлийн бэрхшээлтэй иргэдийн танхимтай бөгөөд гэр бүлийн танхимд эцэг эхчүүд хүүхдүүдээ дагуулан очиж, ном уншиж өгөх төдийгүй интернэтэд холбогдож мэдээлэл авах боломжийг мөн бүрдүүлжээ. Хүүхдийн номын ордон нь тус аймгийн хамгийн ачаалалтай, үйлчлүүлэгч олонтой газруудын нэг болжээ.     

Аймгийн удирдлагуудад ахмадууд зөвлөдөг  

Ерөнхий сайд Н.Алтанхуяг Архангай аймгийн Нутгийн удирдлагын ордны Иргэний танхимд ахмадын зөвлөлийн 40 орчим гишүүдтэй уулзалт хийлээ. Аймгийн удирдлага дэргэдээ ахмадын зөвлөлийг бий болгож, ахмадуудынхаа оролцоог шийдвэр гаргахдаа тусгаж байгаа нь зөв туршлага болж байна, бусад аймаг, орон нутгийнхан үлгэр авах хэрэгтэй гэж Ерөнхий сайд хэллээ.

Тус аймгийн Иргэдийн төлөөлөгчдийн хурлын дарга, Засаг дарга нарт зөвлөдөг ахмадын зөвлөл нь хууль эрх зүй, эдийн засаг санхүү, боловсрол, түүх ёс заншил, хөдөө аж ахуй, нийгмийн бодлого, хот байгуулалт, зам тээвэр гэсэн салбар зөвлөлтэй бөгөөд тухайн салбартаа амжилт гаргаж, хүлээн зөвшөөрөгдсөн нэр хүндтэй ахмадууд ажиллладаг байна.  

Төрийн байгууллагуудаа нэг дор төвлөрүүлж, барилгыг нь цэцэрлэг болгоно  

Тус аймгийн Иргэд хүлээн авах төв нь 7033 11 11 гэсэн утсаар иргэдийнхээ санал хүсэлтийг авч, үдээс хойш нь хариуг утсаар болон уулзалт хийж өгдөг. Сар бүрийн 25, долоо хоног бүрийн баасан гаригт архи худалдаалахыг хоригложээ. Ингэснээр гэмт хэргийн гаралт 30 хувь буурсан гэж аймгийн удирдлагууд хэллээ.

Аймгийн төв талбайг тойрч төрийн байгууллагуудын олон байшин байдаг. Эдгээр байгууллагуудаа нэг байшинд төвлөрүүлж, хуучин барилгуудыг нь цэцэрлэг, сургуулийн дотуур байр болгохоор төлөвлөж байгаа ажээ.  

Н.Алтанхуяг: Хүүхдэд нуугдсан авъяасыг нээн илрүүлж, тордох нь багш хүний гол үүрэг юм  

Бага ангийн багш нар монгол ахуй, ёс заншлыг хүүхдүүдэд сонирхолтой хэлбэрээр багаас нь уламжлуулж заадаг болох учиртай.

Монгол Улсын Боловсролын их сургуулийн Архангай аймаг дахь Багшийн сургуулийн сургалт, хичээлийн байртай Ерөнхий сайд танилцсаны дараагаар бага ангийн багш болохоор бэлтгэгдэж буй тус сургуулийн оюутнуудтай уулзлаа. Ингэхдээ “Монгол хүүхэд бүр авъяастай, багш хүний гол үүрэг бол зааж сургахдаа биш, хүүхдэд нуугдсан авъяасыг илрүүлэх, тордож хөгжүүлэх явдал юм” гэж онцоллоо. Ерөнхий сайд Н.Алтанхуяг шинэчлэлийн Засгийн газрын үйл ажиллагааны талаар товч танилцуулж, боловсролын салбарт онцгой анхаарч байгаа гэлээ.

Бага ангийн багш нар монгол ахуй, ёс заншлыг хүүхдүүдэд сонирхолтой хэлбэрээр багаас нь уламжлуулж заадаг болох учиртай. Үүнийг хэрэгжүүлэх гол хүмүүс бол энэ сургуульд бэлтгэгдэж байгаа оюутнууд та нар юм. Монгол хүүхдүүдээ монголдоо хайртай, монгол хэлэндээ дуртай, бусад улсын ёс заншлыг ойлгодог болгон олон төрлийн чадварыг төлөвшүүлэх нь та бүхний үүрэг гээд багш, оюутнуудад амжилт хүслээ.  60 гаруй жилийн түүхтэй тус сургууль энэ хугацаанд 9000 гаруй багш бэлтгэсэн бөгөөд энэ хичээлийн жилд 1300 гаруй оюутан суралцаж байна