Батлан хамгаалах яамны 100 жилийн ойд зориулсан арга хэмжээ энэ сарын 1-нээс эхлэн ирэх арванхоёрдугаар сар хүртэл үргэжлэх юм байна. Уг ойн арга хэмжээг тохиолдуулан хийсэн болон хийхээр төлөвлөгдөж буй ажлуудаа батлан хамгаалах яамныхан өнөөдөр тайлагналаа.

“МУБХЯ-ны түүх”, “МУБХ сайдууд” намтар судалгааны бүтээл, тусгаар тогтнолын эгзэгтэй асуудлуудыг хэрхэн шийдвэрлэсэн талаар өгүүлэх “Баримт бичгийн эмхэтгэл” гэх гурван боть номыг батлан хамгаалах яамны түүхийг хүмүүст таниулах зорилгоор гаргасан аж.

Мөн монголд анх удаа зэвсэг техниктэй ёслолын жагсаал явуулсан бөгөөд гуравдугаар сарын 18-ны Зэвсэгт хүчний өдрийг “Монгол цэргийн өдөр” болгон “Энхийг сахиулах өдөр”-ийг тэмдэглэхээр болжээ.

100 жилийн ойг тохиолдуулан “Цэргийн наадам” энэ оны есдүгээр сарын 9-ний өдөр Хүй долоон худагт зохион байгуулна гэв. Уг ойн баярт зориулан бүтээсэн “Догшин хар сүлдний нууц” баримтат кино Тэнгис кино театрт нээлтээ хийх юм. Мөн Батлан хамгаалах яамнаас Хөвсгөл, Өмнөговь, Дундговь аймгуудад батлан хамгаалах яамны зорилт үйл ажиллагааг сурталчилсан сургалтыг зохион байгуулж байгаа юм байна. Тус арга хэмжээн дээр үзүүлэх нэгэн содон зүйл бол Энэтхэг улсын мотоцикльтой шүхэрчид ирж Геннисийн номонд бичигдсэн үзүүлбэрээ үзүүлэх болно.Батлан хамгаалахын ойн арга хэмжээнд БНХАУ, ОХУ, ХБНГУ, БНСУ, Энэтхэг, Украйн, Щвейцарь зэрэг найман орны зочид төлөөлөгчид оролцох юм байна.

БХЯ 100 жилийн ойн баяраа тэмдэглэнэ