Тариалангийн салбар энэ онд хүнд цохилтод орсон гэж УИХ дахь МАН-ын бүлэг үзэж байна. Энэ ч үүднээс “Атрын-3” аяныг зогсоосон ҮХАА-н сайд Х.Баттулгад хариуцлага тооцох саналыг судалж эхэлжээ.

Улаан буудайн жилийн хэрэглээний 30 хувийг импортлох хэмжээнд хүрсэн нь салбарын сайдын хариуцлагагүй байдал хэмээн тэд үзэж байна. Ийм энэ долоо хоногт байгаль орчин, хүнс хөдөө аж ахуйн байнгын хорооноос ажлын хэсэг гарган яамны үйл ажиллагааг шалгахаар болжээ.

“Атрын-3” аян, улаан буудайнд урамшуулал өгөх гэх мэт бодлогын үр дүнд Монгол улс 2010 он гэхэд өөрийн Улаан буудайн хэрэгцээг 100 хувь хангаад дээрээс нь 204 мянган тонныг экспортлох хэмжээнд хүрч байсан. Гэтэл өнөөдөр салбарын алдаатай бодлогын үр дүнд 100 мянган тонныг гадагш экспортлох тухай биш, оруулж ирэх тухай ярьж байгаа нь салбарын сайдын хариуцлагагүй хандсан үр дагавар гэж МАН үзлээ.

100 мянган тонн Улаан буудай импортолсноор 30 гаруй сая ам.долларыг цэвэр гадагш алдаж байна. Импортоор орж ирэх буудай нь хэдхэн компанийн гараар орох магадлал өндөр байгаа. Үнэ тогтворжуулах хөтөлбөрийн хүрээнд гаргасан 48 тэрбум төгрөгийн 32 тэрбум нь ганцхан гурилын компанид очжээ.

Энэ талаар УИХ-ын гишүүн Ж.Энхбаяр хэлэхдээ  “Өнөөдөр бид Хятадын зах зээлд зориулж хятадын техникийн тосны ургамлыг тарьж эхэлж байна. Энэ бол туйлын ноцтой. Гэтэл бид асар их тосны ургамал импортоор авч байгаа. Яагаад Монголдоо хэрэглэдэг тосны ургамлыг тарихгүй хятадад хэрэглэдэг тосны ургамлыг тарьж байна.

Яагаад салбарын яам тариаланчдаа дэмжихгүй, яагаад цөөхөн гурил хийдэг үйлдвэрүүдийг дэмжээд байна. Гэтэл тэр үйлдвэрүүд нь гаднаас үр тариаг дэмжиж байна. 100 мянган тонн гэдэг нь манай гурилын хэрэгцээний 30 орчим хувь шүү дээ. Үүнийг гаднаас авъя гэж байна. Тэр хэмжээний тариа тарих сонирхлыг унагааж байна” гэлээ.

Газар тариалангийн салбарт ажиллагсад сүүлийн хоёр жил бие даан ажиллаж эхэлсэн. Төр дэмжихээ больсноос хойш шатахууны бөөний үнэ, жижиглэнгийн үнээс давж гурилын монополь компаниуд Улаан буудайг худалдан авахгүй байгаа тул арга буюу Хятадуудад зориулан тосны ургамлыг ихээр тариалан худалдаалж байна.