Ийгл телевизийн Бадарчийн Жаргалмаа ярилцлагын нэвтрүүлгийн энэ удаагийн дугаарт УИХ-ын гишүүн Д.Батцогт оролцож байна.

- УИХ дахь байнгын хорооны даргаар томилогдсон байгаа. Байнгын хорооны даргын хувьд хийх ёстой ажлуудыг хэр эрчтэй хариуцлагатай хийх төлөвлөлт байна вэ?

Нийгмийн бодлого, боловсрол шинжлэх ухааны байнгын хорооны даргаар томилогдсон. Манай байнгын хорооны эрхэлж байгаа ажлын хүрээнд таван яам байгаа. Эрүүл мэнд, боловсрол, Хөдөлмөрийн яам, хүн амын хөгжил нийгмийн хамгааллын яам, Соёлын яам гэх мэт. Бүгдээрээ л шинэчлэл реформ шаардсан. Ийм салбарууд байгаа. Хүлээгдэж байгаа болон хэлэлцэгдээд явж байгаа олон хуулийн төсөл байна.

Тухайлбал Сайд С.Эрдэнэ болон УИХ-ын гишүүн С.Ганбаатар нарын санаачлан боловсруулсан Иргэний эрүүл мэндийн даатгалын хуулийн анхны хэлэлцүүлгийг байнгын хороогоор хийсэн. Соёлын өвийг хамгаалах тухай хууль анхны хэлэлцүүлэгт  орохоор ажлын хэсэг санал дүгнэлтээ бэлэн болгосон байгаа. Энэ чуулганы хугацаанд энэ хоёр том хуулийг батлаад дуусгана гэсэн бодолтой байна. Ер нь бүхэлдээ шинжлэх ухааны салбар гэхэд л өнөөдөр шинэчлэл шаардаж байна. Өнгөрсөн 20 жилийн хугацаанд төр шинжлэх ухааны салбарт онцгой анхаарч дэмжээгүй.

Тэгэхээр бүтцийн өөрчлөлт, шинэчлэл болон төрөөс ямар зохион байгуулалт хийж эрдэмтдийнхээ дууг төр сонсдог болох уу гэдэг дээр хийх ажлууд байна. Эрүүл мэндийн салбар бүхэлдээ мэдээж шинэчлэл шаардаж байгаа. Хүн амын өвчлөл ихсэж байгаа. Үүнтэй тэмцэх ямар бодлого төрөөс баримтлах чиглэлээр ярилцаж ирэх мягмар гаригт төрөөс эмийн талаар төрөөс баримтлах бодлого гэсэн томоохон хэмжээний хэлэлцүүлэг байнгын хорооноос зохион байгуулах гэх мэт төлөвлөж байгаа ажил их байна.

- Иргэдэд хүлээлт үүсгэж байгаа хууль бол иргэний эрүүл мэндийн даатгалын  хууль. Үнэхээр таатай саналууд сонсогдож байгаа. Жилд сая гаран төгрөг эрүүл мэндийн даатгалд төлөөд жилд ашиглаж чадаж байгаа юу? Мөн өөрийн үр хүүхэд аав ээждээ энэ мөнгөнөөсөө өгмөөр байна. энэ их боломжийг нээх хууль хүлээгдээд байна. хэлэлцүүлэг ямар хэмжээнд явж байна?

Хэлэлцүүлэг маш сайн явагдсан. Ажлын хэсэг олон удаа хуралдаж, иргэдийн саналыг мөн тусгаж байгаа. Ерөнхийдөө иргэний эрүүл мэндийн тухай хуулиар эрүүл мэндийн салбарт шинэ тогтолцоог бий болгох гээд байгаа. Урьд нь эмнэлэгт хичнээн хүн эмчлүүлсэн гэдгээс шалтгаалан мөнгөө авчихдаг байсан бол одоо даатгуулагч өөрөө аль эмнэлэг, ямар эмчийг сонгох уу, тэр үйлчилгээ үзүүлсэн эмнэлэгтээ даатгалын сангаас мөнгө төлөх боломжийг нэгт тавьж байгаа. Дараа нь цахим карттай болж байгаа.

Даатгуулагч эмнэлэгт цахим картаа уншуулаад өвчтөний талаар бүх мэдээллийг авдаг байх боломжийг бүрдүүлж байгаа. Эрүүл мэндийн даатгалын хэлтэс гэж харьяа байгууллага байсныг бие даасан болгож даатгагч, даатгалын газар, эмнэлэг гурвыг холбосон бие даасан олгох зорилт агуулж байгаа.

Үргэлжлэлийг нэвтрүүлгээс ....