Алслагдсан болон говийн бүсийн нэмэгдэл олгох зорилгоор 2009 онд анх санаачилсан Төрийн албаны тухай хуульд нэмэлт өөрчлөлт оруулах тухай хуулийн төслийг хэлэлцсэн боловч өнгөрсөн хаврын чуулганаар олонхын санал авч чадаагүй. Гэсэн хэдий ч УИХ-ын гишүүн С.Бямбацогт нарын 24 гишүүн Төрийн албаны тухай хууль, Боловсролын тухай хууль, Эрүүл мэндийн тухай хуульд нэмэлт өөрчлөлт оруулах тухай, Онцгой албан татварын тухай хуульд өөрчлөлт оруулах тухай, Нэмэгдсэн өртгийн албан татвар, Гаалийн албан татвараас чөлөөлөх тухай багц хуулийн төслийг боловсруулжээ.

Тэд багц хуулийн төслийг өргөн барихаар бэлтгээд байгаа аж. Бүс нутгийн хөнгөлөлт, нэмэгдлийн тухай энэхүү багц хууль хэрэгжсэнээр алслагдсан болон говийн бүс нутагт ажиллаж, амьдарч байгаа иргэдийн амьжиргааг дэмжих, орлогыг нэмэгдүүлэх юм. Ийнхүү орон нутагтаа ажиллаж. амьдрах нөхцөлийг нь сайжруулбал нийслэл рүү чиглэсэн шилжилт хөдөлгөөн, хэт төвлөрлийг сааруулна хэмээн хууль санаачлагчид үзэж байгаа юм байна. Нийслэлийн хэт төвлөрлөөс болж үүсээд байгаа олон асуудлыг шийдэж чадахаараа уг хуулийн төсөл онцлог аж.