Улсын Их Хурлын хавар, намрын ээлжит чуулганы завсарлагаанаар Байнгын хороод ажлаа тайлагнадаг уламжлалтай. Энэ удаад Байгаль орчин, хүнс, хөдөө аж ахуйн байнгын хорооны дарга Г.Баярсайхан  Улсын Их Хурлын 2013 оны намрын ээлжит чуулганы хугацаанд тус Байнгын хорооноос хийж хэрэгжүүлсэн ажлын талаар сэтгүүлчдэд мэдээлэл хийлээ.

Тус байнгын хороо тайлангийн хугацаанд 60,7 хувийн дундаж ирцтэйгээр есөн удаа хуралдаж, давхардсан тоогоор 19 асуудал хэлэлцсэн байна. Байнгын хорооноос хууль тогтоолын төслийн талаарх хэлэлцэх эсэх болон анхны хэлэлцүүлгийн санал дүгнэлт найм гарсан байна. Байнгын хорооноос есөн тогтоол гарснаас хууль тогтоолын төслийг хэлэлцүүлэгт бэлтгэх үүрэг бүхий ажлын хэсэг байгуулах чиглэлээр гурав, Засгийн газар болон яам агентлагт чиглэл өгсөн хоёр холбогдох асуудлаар санал, дүгнэлтийн төсөл боловсруулах гурав, бусад нэг байна. Байнгын хорооны тогтоолоор байгуулагдсан ажлын болон дэд хэсэг 40 удаа хуралджээ.

Мөн Байнгын хорооны үйл ажиллагааны талаарх 12 төрлийн 58 мэдээ, мэдээллийг парламентын myparliament, дотоод, гадаад сүлжээнд оруулж, Агаарын тухай хуульд нэмэлт, өөрчлөлт оруулах тухай хуулийн хувийг хэрэг 33 хуудас, ноорог товьёог 63 хуудас, Байнгын хорооны хуралдааны тэмдэглэл 329 хуудас материалыг архивлан баталгаажуулсан байна.

Мэдээллийн явцад сэтгүүлчид Газрын тухай багц хуулийн төсөл болон Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хаврын чуулганаар хэлэлцэх эсэх талаар тодруулсан юм.

Байнгын хорооны дарга Г.Баярсайхан хариултдаа, “Газрын тухай багц хуулийн төслийг намрын чуулганы хэлэлцэх асуудлын дараалалд оруулсан байсан ч хэлэлцэх асуудал агуулга ихтэй учраас Ажлын хэсэг үргэлжлүүлж ажиллах шаардлагатай байгаа. Иймээс хаврын чуулганы завсарлагааны хугацаанд Байнгын хороо Газрын тухай багц хуулийг хэлэлцээд явна.

Газрын тухай багц хуулийн төсөл болон Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хаврын чуулганаар хэлэлцэх асуудлын жагсаалтад оруулсан. Энэ хугацаанд Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийн Ажлын хэсэг ажиллана. Түүнчлэн Байнгын хорооны хуралдаанаар Малын индексжүүлсэн даатгалын тухай хуулийн төсөл болон уг хуулийг дагалдах бусад хуулийн төслүүдийн хэлэлцэх эсэхийг шийдвэрлэж анхны хэлэлцүүлэгт шилжүүлсэн бөгөөд Улсын Их Хурлын гишүүн А.Бакейгаар ахлуулсан Ажлын хэсэг ажиллаж байна” гэлээ.

Тайлангийн хугацаанд Байнгын хорооны дарга Г.Баярсайхан, Ажлын хэсгийн ахлагч, Улсын Их Хурлын гишүүн Л.Эрдэнэчимэг, ажлын дэд хэсгийн гишүүд Сэлэнгэ аймгийн Баянгол, Орхон аймгийн Баян-Өндөр сумд, нийслэлийн Налайх, Багахангай дүүргүүдэд ажиллаж аж ахуйн нэгж байгууллагуудад химийн хорт болон аюултай бодисын ашиглалт, хадгалалтын байдалд Химийн хорт болон аюултай бодисын тухай хууль болон холбогдох бусад хууль тогтоомжийн хэрэгжилтийн байдалтай газар дээр нь танилцаж, орон нутгийн холбогдох байгууллагын төлөөллийг тухай бүр татан оролцуулж холбогдох тайлбар тодруулгыг авч ажилласан байна.

Мөн Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийн хэрэгжилттэй танилцаж, санал, дүгнэлт гаргах, мөн уг хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хэлэлцүүлэгт бэлтгэх үүрэг бүхий Улсын Их Хурлын гишүүн Д.Арвинаар ахлуулсан ажлын хэсэг Архангай аймгийн Цэнхэр, Өвөрхангай аймгийн Уянга, Бат-Өлзий, Баянхонгор аймгийн Бөмбөгөр сумд, Төв аймгийн Заамар, Дархан-Уул аймгийн шарын гол, Сэлэнгэ аймгийн Ерөө сумд, Хэнтий, Дорнод аймагт нөхөн сэргээлт, олборлолтын ажил эрхэлж байгаа аж ахуйн нэгж, байгууллагуудын үйл ажиллагаанд Байгаль орчныг хамгаалах тухай, Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль болон холбогдох бусад хууль тогтоомжийн хэрэгжилтийн байдалтай газар дээр нь танилцжээ.

Түүнчлэн Баянхонгор, Архангай, Ховд аймгийн нутагт бичил уурхайгаар ашигт малтмал олборлож буй байдалд Ашигт малтмалын тухай, Байгаль орчныг хамгаалах тухай болон бусад холбогдох хуулийн хэрэгжилтийг шалгаж, дүгнэлт гаргах үүрэг бүхий Улсын Их Хурлын гишүүн О.Баасанхүүгээр ахлуулсан Ажлын хэсэг, Говь-Алтай аймагт төмрийн хүдэр олборлох үйл ажиллагаа явуулж буй байдалд Байгаль орчныг хамгаалах тухай болон бусад холбогдох хуулийн хэрэгжилтийг шалгаж, дүгнэлт гаргах үүрэг бүхий Улсын Их Хурлын гишүүн Г.Баярсайханаар ахлуулсан Ажлын хэсэг тус тус ажиллаж хууль, тогтоомжийн хэрэгжилтийн байдалтай танилцжээ.

Тайлангийн хугацаанд Агаарын бохирдлыг бууруулах асуудлын дэд хорооны хуралдаан 2013 оны 11 дүгээр сарын 27-ны өдөр болж, хуралдаанд Агаарын бохирдлыг бууруулах Үндэсний хорооноос 2013 онд агаарын бохирдлыг бууруулах чиглэлээр хэрэгжүүлсэн ажлын талаар танилцуулж, мэдээлэл хийсэн байна.