УИХ-ын  хавар, намрын ээлжит чуулганы завсарлагаанаар Байнгын хороод ажлаа тайлагнадаг уламжлалтай. Энэ удаад Байгаль орчин, хүнс, хөдөө аж ахуйн байнгын хорооны дарга Г.Баярсайхан  УИХ-ын намрын ээлжит чуулганы хугацаанд  хийж хэрэгжүүлсэн ажлын талаар сэтгүүлчдэд мэдээлэл хийлээ.

Байнгын хорооноос хууль тогтоолын төслийн талаарх хэлэлцэх эсэх болон анхны хэлэлцүүлгийн найман санал дүгнэлт гарчээ.  Эрхлэх асуудлын хүрээнд иргэд байгууллагаас нийт 26 албан бичиг, өргөдөл гомдол нэг ирсний холбогдох хариуг өгсний зэрэгцээ Агаарын бохирдлыг бууруулах асуудлын дэд хороо тайлангийн хугацаанд нэг удаа хуралджээ.  

Тус байнгын хорооны гишүүд өнгөрсөн хугацаанд  Сэлэнгэ аймгийн Баянгол, Орхон аймгийн Баян-Өндөр сумд, нийслэлийн Налайх, Багахангай дүүргүүдэд ажиллажээ. Ажлын хэсгийнхэн  аж ахуйн нэгж байгууллагуудад химийн хорт болон аюултай бодисын ашиглалт, хадгалалтын байдалд Химийн хорт болон аюултай бодисын тухай хууль болон холбогдох бусад хууль тогтоомжийн хэрэгжилтийн байдалтай газар дээр нь танилцсан байна.

Урт нэртэй  хуулийн хэрэгжилттэй танилцах, уг хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хэлэлцүүлэгт бэлтгэх үүрэг бүхий ажлын хэсэг хөдөө орон нутагт ажилласан байна.  

Түүнчлэн Баянхонгор, Архангай, Ховд аймгийн нутагт бичил уурхайгаар ашигт малтмал олборлож буй байдалд Ашигт малтмалын тухай, Байгаль орчныг хамгаалах тухай болон бусад холбогдох хуулийн хэрэгжилтийг шалгаж, дүгнэлт гаргах үүрэг бүхий  ажлын хэсэг ажилласныг байнгын хорооны дарга тайландаа онцлов.

5 Мэдээлэл хийсний даргаар тус байнгын хорооны дарга Г.Баярсайхан сэтгүүлчдийн сонирхсон асуултад хариулсан юм.

-Газрын тухай багц хуулийн  болон Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хаврын чуулганаар хэлэлцэх үү?

-Газрын тухай багц хуулийн төслийг намрын чуулганы хэлэлцэх асуудлын дараалалд оруулсан байсан ч хэлэлцэх асуудал агуулга ихтэй учраас Ажлын хэсэг үргэлжлүүлж ажиллах шаардлагатай байгаа. Иймээс намрын чуулганы завсарлагааны хугацаанд манай байнгын хороо Газрын тухай багц хуулийг хэлэлцээд явна.

Газрын тухай багц хуулийн төсөл болон Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хаврын чуулганаар хэлэлцэх асуудлын жагсаалтад оруулсан. Энэ хугацаанд Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийн ажлын хэсэг ажиллана. Манай байнгын хорооны хуралдаанаар Малын индексжүүлсэн даатгалын тухай хуулийн төсөл болон уг хуулийг дагалдах бусад хуулийн төслүүдийн хэлэлцэх эсэхийг шийдвэрлэж анхны хэлэлцүүлэгт шилжүүлсэн. УИХ-ын гишүүн А.Бакейгаар ахлуулсан Ажлын хэсэг ажиллаж байна.