МАХН-ын нарийн бичгийн дарга нар хэвлэлийнхэнд хандаж өчигдөр мэдээлэл хийлээ. Тэд өнгөрсөн жил зохион байгуулсан “Шударга ёсны аян”-аа үргэлжлүүлэн, орон нутгаар явж иргэдтэй уулзахаар болжээ.

УИХ-ын чуулган завсарласантай холбогдуулан тус намыг төлөөлдөг УИХ, Засгийн газрын гишүүд болон намын удирдлагууд, бусад гишүүд баг бүрдүүлж, 21 аймгийг зургаан бүст хуваан 73 суманд ажиллахаар төлөвлөсөн байна. Тэд энэ сарын 20-ноос ирэх сарын 7-ны хооронд МАХН-ын голлох үйл ажиллагааг танилцуулж, санал бодлоо солилцох бөгөөд Засгийн газрын гишүүд 2013 онд өөрсдийн хариуцсан салбарын бодлого шийдвэр, УИХ-ын гишүүд хууль, тогтоомжийн чиглэлээр мэдээлэл өгөх ажээ.

Түүнчлэн МАХН-аас Засгийн газарт дэвшүүлсэн мөрийн хөтөлбөрийн үйл ажиллагааны хэрэгжилт амьдралд хэрхэн бууж, хэрэгжиж байгааг судлах чухал үүргийг хүлээгээд байгаа гэнэ. Үүний дараа МАХН-ын их чуулганыг хуралдуулж, намын үйл ажиллагаандаа үнэлэлт, дүгнэлт өгч, тодорхой шийдвэрүүдийг гаргахаар төлөвлөсөн байна. МАХН-ын их чуулган ирэх дөрөвдүгээр сард товлогдоод байсан ч намын даргын биеийн байдал болон тус чуулганы бэлтгэл ажлыг хангах зэрэг шийдвэрлэх асуудлуудаас болж хойшлуулжээ.

Энэ үеэр МАХН-ын Ерөнхий нарийн бичгийн дарга Г.Шийлэгдамба “Бид “Шударга ёс аян”-ынхаа хүрээнд хөдөө орон нутгаар явж, иргэдийнхээ дуу хоолойг сонсч, УИХ-д суудалтай намуудын мөрийн хөтөлбөрийн хэрэгжилт хэр байгааг харьцуулсан дүгнэлтийг гаргахаар судалгаа хийнэ.

УИХ-д суудалтай намуудын мөрийн хөтөлбөрийн хэрэгжилт хэр байгааг харьцуулсан дүгнэлтийг гаргахаар судалгаа хийнэ.

МАХН-ын туйлын зорилго бол 2016 он хүртэл заавал хамтран ажиллах явдал биш. Харин улстөрийн намууд амлалтдаа хүрдэг, Шударга ёс эвслээс тавьсан мөрийн хөтөлбөр хэрэгждэг, Монголын ард түмний эрх ашгийн төлөө байх нь МАХН-ын туйлын зорилго юм. Хамтарсан Засгийн газрын буюу улстөрийн намын хамтын ажиллагааны цаана ганцхан намын эрх ашиг байж болохгүй. Гэтэл өнөөгийн нөхцөл байдалд харамсалтай нь ганцхан АН-ын эрх ашиг давамгайлах болсон. Үүнийг бид өөрчлөх ёстой.

Үүний тулд бусад улстөрийн намуудтай хамтран ажиллаж байгаа. Бид энэ асуудлыг УИХ-ын гишүүд, бүлгээрээ дамжуулан хаврын чуулганд оруулна. Хамтарсан Засгийн газраас гишүүдээ татах талаар МАХН-ын зүгээс ямар нэг алхам хийхгүй. Энэ засаг төрийг тогтвортой байлгахыг л хүсч байна.

Гэхдээ Засгийн газрыг хариуцлагагүй байсан ч дэмжинэ гэсэн үг биш. Хэрвээ хариуцлагагүй байвал шүүмжлэлийг улстөрийн хүчнүүд хариуцлагатайгаар өрнүүлдэг байх хэрэгтэй. Буруу зүйлийг нь бид нүдээ аниад өнгөрч болохгүй учраас зөв зүйтэй үйл ажиллагааг нь л дэмжинэ, бурууг нь шүүмжилж байр сууриа илэрхийлсээр байх болно. Харин Н.Энхбаяр даргын тухайд улстөрд орох эсэх нь хувь хүний шийдвэр.

Тэгээд ч өнөөдөр Н.Энхбаяр дарга олон нийтэд мэдээлээд байгаа шиг улстөрд орж, Шадар сайд болох гээд байгаа зүйл байхгүй. МАХН-ын даргын хувьд УИХ, Засгийн газарт байгаа гишүүдээрээ дамжуулан өөрийн бодол санаагаа илэрхийлдэг. Бодол санаа гэдэг нь эцэстээ Монголын ард түмэн төр засгийн шийдвэрээс хождог, УИХ-аар батлагдаж буй хуулиуд ард түмний эрх ашиг руу чиглэдэг байх нь чухал гэсэн байр суурийг илэрхийлж байгаа” гэсэн юм.

Ганцхан АН-ын эрх ашиг давамгайлаад байх нь зохимжгүй