Жил бүр улсын хэмжээнд зохион байгуулдаг үйлдвэр, хөдөө аж ахуйн салбарын удирдах ажилтны улсын зөвлөгөөн нийслэлд биш Баянхонгор аймагт болсон нь зөвлөгөөний онцлог байв.

Үйлдвэр, хөдөө аж ахуйн яам улсын нийслэлд болдог уламжлалт зөвлөгөөнийг Баянхонгорт  зохион байгуулсан нь хоёр суманд шинэ сум төсөл хэрэгжиж буйтай холбоотой аж. Энэхүү зөвлөгөөнд зүүн таван аймгаас бусад 16 аймгийн Үйлдвэр, хөдөө аж ахуйн удирдах ажилтнууд болон Үйлдвэр, хөдөө аж ахуйн дэд сайд Ц.Туваан, УИХ-ын гишүүн Д.Ганбат, түүний зөвлөх Н.Ганхуяг, Баянхонгор аймгийн Үйлдвэр хөдөө аж ахуйн газрын дарга, мэргэжилтнүүд оролцсон байна. Хэлэлцүүлэг, удирдах ажилтны зөвлөгөөн энэ сарын 14-ний баасан гарагаас төлөөлөгчдийг хүлээж авахаас эхэлсэн байна.

“Шинэ малчин-Шинэ хөдөө” сэдэвт хэлэлцүүлэг, салбарын удирдах ажилтны зөвлөгөөнд оролцогчид энэ сарын 15–ны бямба гарагийн өглөө шинэ сумын төв сүндэрлэн босч буй Бууцагаан сумыг зорьж сумын бүтээн байгуулалтын ажлын явцтай  танилцаж, “Шинэ малчин-Шинэ хөдөө” сэдэвт хэлэлцүүлэгт оролцов.

Ням гараг буюу энэ сарын 16–ны өглөө Үйлдвэр, хөдөө аж ахуйн салбарын удирдах ажилтны зөвлөгөөн хүүхдийн “Тэмүжин” театрын урлагийн танхимд эхлэв.

Тус зөвлөгөөнд аймгийн удирдлагуудаас гадна УИХ-ын гишүүн Д.Ганбат, Үйлдвэр, хөдөө аж ахуйн дэд сайд Ц.Туваан болон албаны бусад хүмүүс 16 аймгийн Үйлдвэр, хөдөө аж ахуйн газрын удирдах ажилтнуудаас бүрдсэн 200 шахам хүн тус зөвлөгөөнд оролцов.

Үйлдвэр, хөдөө аж ахуйн салбарын удирдах ажилтны зөвлөгөөнийг дэд сайд Ц.Туваан нээж, УИХ-ын гишүүн Д.Ганбат УИХ, Засгийн газраас хөдөө аж ахуйн үйлдвэрлэлийн талаар баримталж буй бодлого чиглэл, Улс орны нийгэм эдийн засгийн өнөөгийн байдал, УИХ, Засгийн газрын үйл ажиллагааны тухай зөвлөлгөөнд оролцогчдод мэдээлэл хийв. Үйлдвэр, хөдөө аж ахуйн дэд сайд Ц.Туваан өнгөрсөн онд хийж хэрэгжүүлсэн ажил үйлчилгээ, энэ онд хийхээр төлөвлөсөн ажил, салбарын бодлого зорилтын талаар дэлгэрэнгүй мэдээлэл хийлээ. Мөн мал аж ахуйн салбарын энэ оны зорилт, хэрэгжүүлэх үйл ажиллагаа, ҮХААГ-ын оролцоо сэдвээр газрын дарга Н.Ганибал, хөнгөн үйлдвэрийн ахлах мэргэжилтэн С.Рэгзэдмаа, хүнсний үйлдвэрийн ахлах мэргэжилтэн Б.Мөнхжаргал, газар тариалангийн ахлах мэргэжилтэн Б.Одонхүү нар мэдээлэл хийж, санал бодлоо солилцсон байна.

Аймгуудын ҮХААГ–ын 2013 оны үйл ажиллагааны гүйцэтгэлд хийсэн дүн, цаашдын үйл ажиллагааны талаар газрын дарга дарга Ж.Сауле  нар зөвлөгөөнд оролцогчдод дэлгэрэнгүй мэдээлэв. Мөн үйлдвэр хөдөө аж ахуйн салбарын энэ оны зорилтыг газрын дарга Л.Чой-Иш хэлэлцүүлсэн байна. Дээрх салбарын чиглэлүүдээр асуулт, хариулт өрнөж, Үйлдвэр, хөдөө аж ахуйн яамтай аймгуудын ҮХААГ–ын дарга нарын 2014 оны үр дүнгийн гэрээнд гарын үсэг зурж зарим хүмүүст шагнал гардуулснаар улсын чанартай энэхүү зөвлөгөөн өндөрлөлөө. Зүүн бүсийн аймгуу­дад шүлхий өвчин дэгдсэн тул Хэнтий, Сүхбаатар, Дорнод, Дорноговь, Говьсүмбэр аймаг энэ зөвлөгөөнд оролцоогүй аж.