Эрүүл мэндийн яам, ДЭМБ, НҮБ-ын Хүүхдийн сантай хамтран “Нярайн эрт үеийн тусламж үйлчилгээний стратеги, төлөвлөгөөг боловсруулах нь” сэдэвт семинарыг энэ сарын 24-27-ны өдрүүдэд зохион байгуулж байгаа юм байна.

Энэхүү семинарыг Номхон Далайн Баруун Эргийн Бүсийн “Эрүүл нярай 2014-2020” стратеги төлөвлөгөө гарсантай холбогдуулан зохион байгуулж байгаа аж. Уг арга хэмжээнд аймаг, нийслэлийн эх барих эмэгтэйчүүд, хүүхдийн эмч, нярайн болон хүүхдийн тасгийн сувилагч зэрэг 20 гаруй мэргэжилтэн оролцож байгаагаараа онцлогтой болж байгаа гэнэ. Мөн энэхүү сургалтад НҮБ-ын Хүүхдийн сангийн Бүсийн зөвлөх Ховард Собел, Набила Зака нар оролцжээ.

Энэхүү зөвлөгөөний нээлтийн үйл ажиллагаанд Эрүүл мэндийн сайд Н. Удвал, ДЭМБ-ын болон НҮБ-ын Хүүхдийн сангийн Монгол дахь Суурин төлөөлөгчид оролцон нярайн тусламж үйлчилгээг сайжруулах, хэрхэн хамтран ажиллах талаар санал солилцжээ.

Мөн семинарт оролцогчид Бүсийн зөвлөхүүдтэй хамтран дадлагад суурилсан шийдвэрийг гарган, “Нярайн эрт үеийн тусламж үйлчилгээний стратеги төлөвлөгөөг боловсруулж, түүнийг хэрэгжүүлэх арга зүйг нэвтрүүлэхэд боловсон хүчний болон санхүүгийн зэрэг шаардлагатай нөөцийг тодорхойлох юм байна.

Нярайд тусламж үзүүлэх сургалт боллоо