УИХ-ын гишүүн С.Бямбацогттой ярилцлаа.

-Та Ховд аймгийн зарим суманд өвөлжилт хүндэрсэн талаар хэд хоногийн өмнө мэдээлж байсан. Одоо байдал ямар байна вэ?

-Энэ жилийн хувьд ганц Монгол Улс ч биш дэлхийн олон оронд сүүлийн 40-50 жилд болоогүй байгалийн гамшигт үзэгдэл болж бай-на. Энэхүү хүндрэл сая гэнэт эхэлсэн хэрэг ч биш. Өнгөрсөн аравдугаар сараас эхэлж байдал хүндэрсэн. Хөдөөд малчид чадлынхаа хэрээр цас зудтай тэмцэж, орон нутгийн удирдлагууд шуурхай арга хэмжээ авч байгааг хэлэх хэрэгтэй. Харамсалтай нь нөхцөл байдал тэдний хүч чадлаас хэдийнэ давж, төр засгаас анхаарал хандуулж, тусламжийн гараа сунгах зайлшгүй, шаардлагатай боллоо. Хөдөөгийнхөн төрийн болон төрийн бус байгууллага, нутгийн зөвлөлдөө хандахаас аргагүй тийм хүнд нөхцөл байдал үүсчихээд байна. Ховд аймгийн нутгийн зөвлөлөөс хамгийн түрүүнд цас зудны аюулд нэрвэгдээд байгаа малчдадаа туслах уриалгыг гаргаж, хэвлэлийн бага хурал хийлгэсэн. Нөхцөл байдлыг төр, олон нийтийн болоод Улаанбаатар хотод ажиллаж амьдарч байгаа нутгийнхны сонорт хүргэсний хүчинд малчдадаа туслах тодорхой санаачилгууд өрнөж байгааг дуулгахад таатай байна.

-Монголын ардчилсан социалист залуучуудын холбооноос малчдадаа туслах зорилгоор "Сэтгэлийн дэм" аяныг зохион байгуулж эхэлсэн. Сайн үйлсийн аян хэр урагштай байна вэ?

-Малчдадаа туслах уриалгыг хамгийн анх Монголын ардчилсан социалист залуучуудын холбоо дэмжсэнд талархаж байгаа. МАСЗХ болон "Үндэсний шуудан" сонин, МҮОНРТ-тэй хамтран "Сэтгэлийн дэм" аяныг өрнүүлсэн нь маш далайцтай ажил боллоо. Үүний үр дүнд төр, засгаас, бусад аймгийн Нутгийн зөвлөлүүдээс тусламжийн олон арга хэмжээ зохион байгуулж байна. Ховд айм-гийн нутгийн зөвлөл МАСЗХ малчдад хөнгөлөлттэй үнээр өвс тэжээл хүргэх уриалга гаргасан. Засгийн газар бидний уриалгыг хүлээн авч малчдын талаар шуурхай,,арга хэмжээ аван, өвс тэжээлийн үнийг 50 хувь хөнгөлөх шийдвэр гаргалаа. Бензин шатахууны зардал, хүн эмнэлгийн нэмэлт машин гаргах гээд Засгийн газар тулгамдсан олон асуудлыг нааштайгаар шийдвэрлэж байна. Зуд нүүрлэсэнтэй холбогдуулан малчид малаа их хэмжээгээр нядалсан. Үүнтэй холбогдож малын махыг экспортлох тал дээр анхаарал хандуулж, туслалцаа үзүүлэхийг холбогдох байгууллагуудаас хүссэн. Гадаад харилцааны сайд, МАСЗХ-ны ерөнхийлөгч Г.Занданшатар олон улсын хүмүүнлэгийн байгууллагуудад хандаж Монголын малчдад туслахыг уриалсан.

-"Сэтгэлийн дэм" аяны хүрээнд ямар ажлууд хийхээр төлөвлөж байгаа вэ?

-Бид дан ганц төр засагт найдаад суух биш өөрсдийнхөө хүчээр юу хийж болох талаар нухацтай ярилцсан. "Сэтгэлийн дэм" аяны хүрээнд бүх сургууль, цэцэрлэгийн хүүхдүүдэд хандаж хөдөөбайгаа үе тэнгийнхэндээ нэг ширхэг лаа, шүдэнзээр ч болтугай туслахыг уриалж байгаа. Нийслэлийн төр, захиргааны байгууллагынханд хандаж нэг өдрийнхөө цалинг хандивлаач гэсэн хүсэлт тавьсан юм. Тэд бидний эхлүүлсэн "Сэтгэлийн дэм" аяныг талархан дэмжиж нэг өдрийнхөө цалинг хандивласанд талархаж байгаагаа хэлье. Тун удахгүй хандивын тоглолтыг зохион байгуулахаар төлөвлөж байна. Манай урлаг соёлын алдартнууд нэлээд идэвхтэй оролцох байх. МАСЗХ-ноос жил бүр шалгаруулдаг "Алтан сарнай"н өргөмжлөлт оны шилдгүүд энэхүү сайн үйлсийн аянд идэвхтэй оролцож, тодорхой хэмжээний хандивын аян өрнүүлэхээр ярьж тохирсон. МҮОНРТ-ийн "Өглөө" хөтөлбөрийн хамт олонтой хамтарч нэвтрүүлгүүд бэлтгэх, хандивын мессежний тусгай дугаар ажиллуулахаар төлөвлөсөн. Цаг агаарын хүндрэл одоо дөнгөж эхэн үедээ байна. Цаашлаад ирэх дөрөвдүгээр cap хүртэл үргэлжилнэ гэж бодож "Сэтгэлийн дэм" аяны хүрээнд хэрэгжүүлэх арга хэмжээнүүдээ тооцсон.

-Удахгүй мал төллөж эхэлнэ. Зарим хувь хүн, албан байгууллага мал төллөх үеэр малчны хотонд очиж өөрийн биеэр туслах санаачилга нэлээн гаргаж байгаа гэж дуулсан. Энэ талаар илүү тодорхой мэдээлэл өгнө үү?

-МАСЗХ бол эгнээндээ 60 гаруй мянган гишүүн дэмжигчдийг эгнээндээ нэгтгэсэн Монгол Улсын 21 аймаг, есөн дүүрэгт салбартай үндэсний хэмжээний байгууллага. Монгол Улсын улс төр, нийгэм, эдийн засгийн салбарын тэргүүн эгнээнд ажиллах зорилготой залуусыг өөртөө нэгтгэдэг. Өнгөрсөн онд нийгмийн ардчиллын аяныг улс орон даяар өрнүүлж, чуулга уулзалт зохион байгуулсныг олон нийт сайн мэднэ. Монгол залуу хүн бүтээлч, хариуцлагатай, эх оронч, эрүүл, боловсролтой байх зорилт дэвшүүлсэн. Энэ хүрээнд цаг агаарыг хунд нөхцөлд малчдынхаа төлөө бүтээлч ажил хийе гэж зориг шулуудсан хэрэг. Мал төллөх үед малчдад хүн хүчээр туслах талаар санаачилга гарсны дагуу тодорхой судалгаа хийж байгаа. Тэнхээтэй явахад тэмээгээр тусалснаас тэвдэж явахад тэвнээр тусал гэсэн өвгөдийн сайхан гэрээс үг бий. Хүнд байдалд байгаа малчдадаа сэтгэл санааны болон биеийн хүчээр туслах аяныг МАСЗХ өрнүүлж байгаа юм.

-Тусламж, хандивын түрүүч яг хэзээ малчны хотонд хүрэх вэ?

-МАСЗХ-ноос хоёр ч удаа хэвлэлийн бага хурал хийлгэсэн. Малчдад туслах аяны хүрээнд хүмүүсийн өгсөн хандивыг Засгийн газар олон улсын тусламжийн байгууллагуудын оролцоотойгоор тээврийнх нь зардлыг дааж эзэнд нь хүргэнэ гэдгээ МАСЗХ мэдэгдсэн. Нэр, хаягтай тусламжийг эзэнд нь, хаяггүй бол хэнд тусламж хэрэгтэй байна түүнд хүргэх юм.

-Тусламжийн цуваа хэзээ хөдөөг зорих бол?

-Хандивын анхны цуваа хоёрдугаар сарын нэгэнд Сүхбаатарын талбайгаас хөдөөг зорин хөдөлнө.

С.Бямбацогт: Тусламжийн эхний цуваа ирэх сарын нэгэнд хөдөөг зорино