Монголын үндэсний олон нийтийн телевизийн "Ярилцъя" буланд "Цөмийн энергийн газрын дарга Н.Тэгшбаярын өгсөн ярилцлагыг хүргэе.

- Цөмийн энерги, цөмийн технологийг ашигладаг гэсэн ойлголт төрлөө. Миний ч мэддэггүй олон зүйл цөмийн технологитой холбоотой байдаг юм байна. Энэ бол мэдэхгүйгээсээ болж л айдаг болохоос мэдэж авах хэрэгтэй, улс орны хөгжилд маш чухал зүйл гэдэг нь харагдаж байсан.

Тэгэлгүй яахав. Бүх л салбарт цөмийн технологийг хэрэглэж байна. Энгийн жишээгээр ярья. Машины дугуйг сайжруулж, хэрэглэх хугацааг уртасгахад, цахилгааны утасны ачаалал даах чадварыг сайжруулах мөн эмэгтэйчүүдийн гоо сайхны бүтээгдэхүүнийг хоргүйжүүлэх, шүдийг эмчилж, оношлоход цөмийн технологийг ашиглаж зургийг нь авдаг. Монгол улс эрхтэн шилжүүлж суулгадаг болсон энэ үед эрхтэн шилжүүлэх бүх үе шатанд мониторинг хийхэд, өвчнийг оношлоход, эмчлэхэд хэрэглэдэг. Мөн уул уурхай, хөдөө аж ахуйн гээд нийгмийн бүх салбарт хэрэглэж байна.

- Саяхан Нэгдүгээр эмнэлэгт цөмийн технологийг ашиглаж хамгийн сүүлийн үеийн оношилгооны тоног төхөөрөмжийг гардуулж байгаа тухай мэдээлж байсан?

Манай улс Олон улсын Атомын энергийн агентлагийн гишүүн болоод 40 гаруй жил болж байна. Олон улсын атомын энергийн агентлаг, манай агентлаг, Нэгдүгээр эмнэлэг, Засгийн газар хоорондоо ярьж байгаад хоёр толгойт спект гамма камер суурилуулсан. Ингэснээр олон хүмүүсийн үе мөч, таван цул эрхтэн, яс, тархины гэмтэл бэртэл зэргийг дэлхийн түвшинд оношлох боломжтой аппараттай болж байгаа юм. Өөрөөр хэлбэл гадаад улс руу их мөнгө үрж оношлуулж, эмчлүүлэхээр явах бус, Монголдоо оношлуулж, эмчлүүлэх боломжтой болж байна гэсэн үг юм.

- Эрүүл мэндийн салбараас гадна хүнсний салбарт цөмийн технологийг ашигладаг юм байна?

Бидний өдөр тутам уудаг савлагаатай ус байна. Усыг автоматаар савлах явцад дүүрлээ гээд автоматаар мэдэрдэг төхөөрөмжид цөмийн технологи ашиглаж байна. Хүнсний бүтээгдэхүүний хадгалах хугацааг уртасгахад хэрэглэж байна. Мөн хүнсний бүтээгдэхүүнийг хоргүйжүүлэхэд ашиглаж байна.

- Эмэгтэйчүүдийн гоо сайхан гэснээс хүүхдийн живхний шингээх чадварыг сайжруулахын тулд цөмийн технологийг ашигладаг гэж сонссон?

Хүүхдийн живхнээс гадна бидний нүдэнд харагдаж, гарт баригдахгүй жижиг хэсэгт ойртох тусам цөмийн технологи ашиглаж байна. Жишээ нь, Гэмт хэргийг илрүүлэх зорилгоор ашиглаж байна. Гэмт хэрэгтнээс үлдсэн нэг ширхэг үсийг цөмийн технологиор томруулж спектр анализ хийж эзнийг нь тогтоодог. Цөмийн технологи нь бидний харж чадахгүй байгаа хэсэгт ч ажиллаж чаддаг. Гаалиар хориотой бараа бүтээгдэхүүн орж ирж байгаа эсэхийг шалгадаг тоног төхөөрөмж өөрөө цөмийн технологи дээр суурилсан байдаг.

Үргэлжлэлийг нэвтрүүлгээс...

Гэмт хэргийг цөмийн технологиор илрүүлнэ