Иргэдийн амьдралын түвшинг сайжруулах асуудлаар “Үндэсний сипфозиум” анх удаа зохион байгуулагдлаа. Жилээс жилд тоо толгой нь цөөрч байгаа цаа бугын тоог өсгөхийн тулд нарийн арга хэрэгтэй.

Нэг үе Хөвсгөл аймгийн Улаан-Уул, Рэнчинлхүмбэ сумын нутгаар Цаатангууд тархан амьдарч байсан. Харин одоо тус аймгийн Цагааннуур суманд цаатан иргэд суурьшин амьдарч байна. Жил бүр цаа бугын тооллогыг явуулж байхаар тогтоосон бөгөөд өнгөрсөн оны сүүлчээр цаа бугын тоо 1510 гэж бүртгэгджээ. Гэхдээ цаа бугын тоо, толгой жилээс жилд хорогдож байгаа нь цус ойртох, элдэв халдварт өвчлөлтэй холбоотой гэнэ. Харин тайгад амьдарч байгаа 524 цаатан иргэдийн эрүүл мэндийн асуудал хамгийн ихээр анхаарал татаж байна.

Монголын хүнс, хөдөө аж ахуйн үндэсний ассоциацийн Ерөнхийлөгч Р.Мөнхбат: “Цаатан иргэдийн эрүүл мэндийн асуудал ноцтой тавигдаж байна. Уулын өндөр, хүйтэн газарт байдаг учраас шээс, бөөр, шүд нэлээд хэмжээгээр өвчилдөг. Нас богино. Дээр нь цаа бугын аж ахуйг эрчимтэй хөгжүүлэх талаар бид дорвитой арга хэмжээ авч чадахгүй байна.”

Өнөөдөр дэлхий дээр цаатан үндэстэн устаж үгүй болох хэмжээнд хүрчихээд байна. Тэгэхээр төрийн зүгээс Цаатан иргэдийнхээ эрүүл мэнд, амьдралын түвшинг сайжруулахад онцгой анхаарах шаардлагатай. Манай улсын хэмжээнд Цаатан иргэд, цаа бугыг хамгаалах чиглэлээр үйл ажиллагаа явуулдаг төрийн болон хувийн хэвшлийн 30 гаруй байгууллага бүртгэгджээ. Гэхдээ тэдэнд нэгдсэн бодлого дутагддаг байна.

Хөвсгөлийн тайгад амьдарч байгаа цаатан иргэд цаа бугын сүргийг ашиглан аялал жуулчлалыг хөгжүүлэх бүрэн боломжтой гэж тооцдог байна. Гэхдээ тэд бүтэц, тодорхой маршрут тогтоож өгөөгүйгээс энэ боломж хязгаарлагдаж байгаа гэв. Ер нь төрийн бодлого цаатан иргэдээ тусгаарлахаас илүүтэй нийгэмшүүлэх, тэдний хэл соёл, ахуй амьдралыг болон орчин нөхцлийг бүрдүүлэх чиглэлээр анхаарах хэрэгтэйг уулзалтад оролцогчид хэлж байлаа.