ОХУ-ын Алс Дорнодод орших Еврейн автономит тойрогт амьдардаг 28 настай Ли хэмээх хятад залуугийн ажлын урт өдрөө дуусав. Тэр соустай гахайн хавиргыг хятад архиар даруулан зооглоно. Гадаа -20 градус хүйтэн ч гахай, үхэр тэжээхэд зориулсан шар буурцгийн ургац хураалт үргэлжилсээр.

Ли Asahi Shimbun гэх Япон сонины сурвалжлагчид “Оросод ирснээр миний орлого 10 дахин нэмэгдсэн” гэж сэтгэл хангалуун ярина. Хятадад тэр энгийн хятад тариачныхаас хоёр дахин их газартай байв. Харин Оросод наймуулаа нийлээд 300 га газрыг түрээсэлдэг. Тэд бүгдээрээ Манжуурт үйл ажиллагаа явуулдаг “Baoefengshou” нэртэй Хятадын хөдөө аж ахуйн компаний төлөө ажилладаг. Уг компани Алс Дорнодод 4,7 мянган га газрыг түрээсэлж шар буурцаг тариалдаг бөгөөд удахгүй дахин дөрвөн мянган га-г авах ажээ. Ургуулсан шар буурцгаа үхрийн тэжээл ихээр дутагддаг Хятад улсдаа экспортолдог.

Оросууд өөрсдөө ажиллах дургүй

Сибирт шар буурцгийн ургац хураалт явагдаж байх зуур Урал дахь Останино тосгонд хятадууд хүлэмжид ургуулсан улаан лоолио хайрцаглаж байдаг. Өмнө нь Екатеринбургт наймаа хийдэг байсан нэгэн сүйхээтэй хятад соёлт нийгмээс гээгдсэн энэхүү тосгонд хэдэн жилийн өмнө ирсэн байна. Социализмын үед хамтралын гишүүн байсан тосгоны оршин суугчид өмч хувьчлалаар газраа үнэгүй авсан байлаа. Харин тэр газрыг дээрх хятад хүн хямдхан худалдан авч Golden Land нэртэй компанийг байгуулж эх орноосоо ажилчид авчирчээ. Тэд тэндхийн дэлгүүрээс архи, хиам, янжуур хангалттай худалдаж аваад олон таван үггүй сарампай оромжинд амьдардаг ажээ.

Алс Дорнод

Энэ зуур компани орон нутгийн зах зээл дээр тарьсан улаан лоолио борлуулж бизнес нь цэцэглэсээр. Компаний эзэн өөрөө Харбин хотод байнга амьдарч Хятадын тосгодоор ажилчид илгээх ажилтай. Ажилчид дутагдахын зовлон байхгүй. Манжуур болон тэндхийн гурван мужид л гэхэд 100 орчим сая хятад амьдардаг. Сарын 650 долларын цалингийн төлөө (Golden Land компаний санал болгодог цалин) олон хятад хүн гуравдугаар зэрэглэлийн вагонд Сибир хүртэл чихцэлдэн явахад бэлэн.

Golden Land бол Свердловск мужид байдаг есөн том хятад компаний зөвхөн нэг нь юм. Түүнээс ч илүү тооны компани хөрш зэргэлдээ Челябинск мужид бий. Тэр байтугай Хятадууд гэрээс нь олон мянган километрын зайд орших Москва, Петербургийн орчим ногоо тарьдаг.

Алс Дорнод дахь хятад ногоочин

Останино тосгоны оршин суугч Владимир Баласаняны ярьж буйгаар хэдийгээр Оросын Засгийн Газар орос хүн өөрийнхөө талбай дээр ажиллаасай гэдэг ч орос тариачид өөрсдөө ажиллахыг хүсдэггүй ажээ. Одоо Владимир Баласанян Хятадын компанид бригадын ахлагчаар ажилладаг, харин үүнээс өмнө Хятадууд газар худалдаж авахын тулд түүний овог, нэрийг ашигладаг байжээ.

Хятадууд нутгийн иргэдтэй найрсаг харилцаатай байхыг хичээж ажилд нь тусалсан хүн болгонд үнэгүй улаан лооль өгдөг байна. Гэхдээ ихэвчлэн настай хүмүүс ирдэг ажээ.

Хятадууд 426 мянган га газар түрээсэлдэг.

1,3 сая хүн амтай Хятад улсад тариалангийн газрын хүрэлцээ маш муу. Гэхдээ уг асуудлын шийдлийг хилийн цаана олж болно. ОХУ-ын асар уудам газар нутаг дээр ердөө 141 сая хүн амьдардаг. ЗХУ задарч хамтралын аж ахуй алга болсноор бүх тариан талбайн дөрөвний нэг нь ашиглалтгүй орхигджээ. Энэ бол манай гариг дээрх хамгийн том тариалангийн талбайн нөөц юм. Алс Дорнодод дөнгөж зургаан сая орос амьдардаг.

Гэвч нөхцөл байдал аажмаар өөрчлөгдөж байна. Хятадын «Синьхуа» агентлагийн мэдээлснээр Биробиджан болон Хабаровскийн хязгаарт зөвхөн 2012 онд хятадууд 426 мянган га газрыг эзэмших эрх авчээ. Тэд өөрсдийн компанийг байгуулж, ажилчдаа Хятадаас авчирдаг.

Айдас, түгшүүр

Улаан лооль, шар буурцгийн бизнес цэцэглэж байх зуур амгалан тайван хамтын ажиллагааны цаана үл итгэлцэл, түгшүүр нуугдаж байдаг. Орос, Хятадын хооронд түүхэн тооцоо цөөнгүй бий. 19 дүгээр зуунд Хаант Орос Хятадын газар нутгаас нэлээн том талбайг өөртөө нэгтгэсэн. 1969 онд коммунист дэглэмтэй хоёр гүрэн Уссури мөрний хоёр талаас буудалцаж байсан. Хилийн зурвас тогтоох тухай хэлэлцээрт тавхан жилийн өмнө гарын үсэг зурсан.

Хятадууд Алс Дорнодод тариалан эрхлэхийн зэрэгцээ тэндхийн орос эмэгтэйчүүдтэй гэрлэх тохиолдол олон

Үл итгэлцэл, үзэн ядалт хил орчмын Амур мужийн Благовещенск хотын оршин суугчдын дунд илэрхий. Уг хот Оросууд ихээр зорчдог Хятадын Хэйхэ хотын эсрэг оршдог. Оросын эрх баригчид хятад хотыг хөндөлдүүлэн офисын барилга, томоохон цэцэрлэгт гудмуудыг барьжээ. 1891 онд нэгдүгээр Николай хаан Амурт ирсэн үйл явдалд зориулж босгосон, дараа нь большивикууд нурааж хаясан хөшөөт хаалгыг ч сэргээн босгожээ. Хаалганы дээд талд “Амурын газар өнгөрсөн, одоо, ирээдүйд Оросын нутаг байна” гэж бичжээ.Уг үзэл санааг бодит амьдралд хэрэгжүүлэхийн тулд Кремлийнхэн, мужийн удирдлага эзгүйрсэн нутгуудыг хүн амжуулах тусгай хөтөлбөрийг боловсруулав. Хүссэн хүмүүст эзгүйрсэн байшин, тариан талбай, малын тэжээл, хэдэн зуун мянган рублийг санал болгоод байна.

Хятадуудын түрэмгий урсгалаас эмээх Оросуудын айдсыг Благовещенскийн Конфуцийн институтын захиралын ярианаас сонсч болно. Америк сэтгүүлчид

Оросын Благовещенск ба Хятадын Хэйхэ хот

өгсөн ярилцлагадаа тэр олон хятад оюутан тагнуул байдаг гэж хэлжээ. Тэр байтугай Хятадын газар нутагт Сибирийг багтааж зурсан газрын зургийг зөвхөн хятад жуулчдад үзүүлдэг музей Хэйхэ хотод байдаг гэсэн цуу яриа ч бий.

Дээрх хандлагад үндэслээд яагаад Амур мужийн удирдлага хөдөө аж ахуйн салбарт ажилладаг хятад ажилчдад виз олгохоо больсныг ойлгож болох юм. Мужийн захирагчийн үзэж буйгаар хятад ажилчдыг хойд солонгосчуудаар солих хэрэгтэй ажээ.

Түүнчлэн орон нутгийн удирдлага хятадууд бордоондоо химийн хорт бодис ашигладаг, хууль зөрчиж талбай дээр ахуйн хог хаядаг хэмээн үзэж байна.

Хятадуудтай холбогдуулан хийсэн Амур мужийн ажлаас үлгэр авч Красноярскийн хязгаар, Челябинск болон Нижний Новгород мужийн удирдлага адилхан арга хэмжээг авчээ.

Оросын Алс дорнод хятаджиж байна