УИХ-ын гишүүн  О.Содбилэг Орхон аймгийн Жаргалант сумын сургуулийн дотуур байрны. тохижилтыг хийж, эцэг эхээсээ хол амьдарч байгаа хүүхдүүдийн амьдрах орчинг сайжруулахад туслалцаа үзүүллээ.

Уг дотуур байр баригдаад 30 гаруй жил болж байгаа бөгөөд тус сумын малчин өрхийн 40 орчим хүүхэд амьдардаг аж. Орон сууцны зориулалтаар баригдсан уг барилгыг засварлан дотуур байр болгосон боловч ор, сандал, ширээ нь олон жил болж хуучирсан байжээ.

Тиймээс эрхэм гишүүн О.Содбилэг хөрөнгө гаргаж байрны шалыг хулдаасалж, зориулалтын ор, хувцсаа хийх шүүгээ, зурагт, компьютер зэргээр хүүхдүүдийг хангасан юм. О.Содбилэг гишүүн “Би хаврын чуулганы завсарлагаанаар тойрогтоо ажилласан.

Энэ үеэр Жаргалант сумын сургуулийн дотуур байрны хүүхдүүдийн амьдралтай танилцсан юм. Хүүхдүүдийн амьдрах орчин нөхцөл тийм ч таатай биш байсан учраас би БШУЯ-нд хүсэлт гарган дотуур байрны тохижилтод дэмжлэг авч, хүүхдүүдийн амьдрах орчинг бага ч болов тохитой болгосондоо баяртай байна” гэлээ. Тохижилтын ажилд тэрбээр 20 гаруй сая төгрөг зарцуулсан аж.